افغانستان جمهور رئیسی محمداشرف غنی، روزه آیینینگ 27- کونیدن باشلب روزه بیرم هییتینینگ 5- کونیگچه طالبلرنینگ برابریده اوربند اعلان قیلدی.
جمهور رئیس غنی، امنیتی کوچلردن شونچه مدتده افغانستانلیک طالبلرنینگ برابریدهگی عملیاتلرینی توختهتیشینی سورهدی؛ بیراق داعش، القاعده ترماغی و باشقه تروریستی گروهلرنینگ برابریده عملیات دوام ایتیشینی بیلدیرگن.
جمهور رئیس بیر پیام آرقهلی کابلده دین عالملری تامانیدن یولگه قوییلگن ییغین گه اشاره قیلیب ایتیشیچه، افغانستان حکومتی دین عالملری تامانیدن خودکش و پارتلش هجوملر توغریسیده صادر ایتیلگن فتوادن حمایت قیلیب و «اوربند تکلیفینی قبول قیلهدی.»
تورت کون آلدین، افغانستاننینگ ایریم منطقهلریدن یوزلرچه دین عالمی کابلده توپلهنیب و مملکتده دوام ایتیب کیلهیاتگن اوروش گه قرشی فتوا بیرگنلر. اوشبو فتواده قوراللی طالبلردن افغانستان حکومتی تامانیدن تکلیف ایتیلگن تینچلیکنی شرطسیز قبول قیلیشلری سورهلگن.
بوندن باشقه دین عالملری بنگیوار ماده، شراب ایشلب چیقاریش و آلیب کیلیش، تبعیض و فسادگه قرشی فتوا صادر قیلگنلر. عین حالده، صادر ایتیلگن فتواده مسؤول ادارهلردن اجتماعی ترماقلر و میدیالرده بولهدیگن قرهمه قرشیلیکلر و تبعیض گه توسیق بولیش اوچون سعی و حرکت قیلیشلرینی طلب قیلگن.
