مرکزی بغلان تومنی باشلیغی گوهرخان بابری‌نینگ سلام‌وطندارگه ایتیشیچه، اوتکن دوشنبه کون، بیر 37 یاشر عیال، قشاق‌لیک باعث، مرکزی بغلان تومنی‌نینگ کهنه قیشلاغی‌ده، اوزی‌نینگ دارگه آسگن.
جناب بابری‌نینگ کوپه‌یتیریشیچه، بو عیال‌نینگ ایری، ایش‌سیز و جوده‌هم قشاق ایکن. او روزه بیره‌م هییتی ییتیب کیلیشی بیلن عایله‌سی‌نینگ نیازلرینی تأمین ایته آلمه‌گن.
بو عیال، ایری بیلن تیره‌شگنی‌دن کیین، خودکش‌لیک قیلگن. مذکور عیال‌دن تورت باله قالگن.
مرکزی بغلان باشلیغی‌نینگ ایتیشیچه، مذکور تومن امنیه قومندانلیگی جنایی تیرمه جماعه‌سی تیکشیرویگه کوره، مذکور عیال‌نینگ خودکش‌لیک دلیلی قشاق‌لیک ایکن.
افغانستان‌ده ایش‌سیزلیک و قشاق‌لیک سانی کونسه‌یین کوپیماقده. مملکت‌ده هزینه‌لی و ایریم رسم و رواج‌لر باعث، بیر کم‌بغل عایله اوچون خرجت تأمین‌لش جوده‌هم قیین دیر؛ شونده‌ی بیرحالده هییت‌لر ییتیب کیلیشی بیلن، هییت خرجتی‌نی تأمین‌لش بونده‌ی بیر عایله‌گه جوده‌هم قیین توشه‌دی.
سونگی آی‌لرده، مملکت‌ده قشاق‌لیک سبب، خودکش‌لیک رقمی کوزگه کورینرلی شکلی‌ده کوپیگن. نیچه پیت آلدین هرات ولایتی‌ده بیر ساده ایشچی، عایله‌سی‌نینگ کونده‌لیک خرجت‌نی تأمین‌لشگه قادر بولمه‌گنی باعث اوزینی اوتگه یاندیریب هلاک بولگن ایدی.
