جمعه‌دن شنبه گه اوتر کیچه یریمی‌دن سونگ، ساعت 3 اطرافیده بغلان ولایتی‌نینگ دوشی تومنی کیله‌گی منطقه‌سیده تاجیکستان و اوزبیکستاندن کیله‌دیگن برق پایه‌لریدن بیری طالب‌لر تامانیدن ییقیتیلگن.
کمیده اوتگن 20 کونده بو ایکینچی برق پایه‌سی دیر کیم کیچه‌نینگ یریمی‌ده طالب‌لر تامانیدن ییقیتیلگن.
باشقه تاماندن، بوگون ایرته‌لب دوشی تومنی‌نینگ کیله‌گی منطقه‌سیده کابل-شمال قتناو یولی گه طالب لر هجوم قیلیب بغلان پولیس کوچلری‌نینگ تورتینچی آمری محمدحسن کشمی، کابل کیته‌دیگن چاغیده اوققه توتیلگن.
بونگه قوشیمچه، قوراللی طالب‌لر بو هجوم‌ده پولیس قرارگاهی اوستیگه هجوم قیلیب و پولیس کوچلری بیلن آتیشگن‌لر.
عین حالده، ییقیلگن پایه‌نی قیته قوریش اوچون منطقه گه بارگن بغلان ولایتیده غوری برشنا ترماغی باشلیغی سلطان‌احمد عزیزی، سلام‌وطندار بیلن تلیفون علاقه قوریب آتیشمه آره‌سیده قالگنینی بیلدیرگن.
جناب عزیزی‌نینگ ایتیشیچه، مذکور منطقه‌ده حربی‌لر و طالب‌لرنینگ آره‌سیده یوز بیرگن آتیشمه دوامی کابل برقی باغله‌نیشی و ییقیتیلگن پایه قیته قوریلیش ایشینی قیین‌لشتیرگن.
بغلان پولیس قومندانی اکرام‌الدین سریع، مذکور ولایت‌نینگ پولیس کوچلری تورتینچی سمت آمری طالب‌لر تامانیدن هلاک ایتیلگنینی تصدیق‌لب ایتیشیچه، دوشی تومنیده طالب‌لرگه قرشی ییر و هوا دن حربی عملیات باشلنگن.
اونگه کوره، حاضر بغلان-کابل قتنا یولیده خوفسیزلیک تأمین‌لنگن و جدی قیین‌چیلیک یوق دیر.
کمیده ایکی هفته آلدین، کیله‌گی منطقه‌سیده کیچه تاماندن برق پایه‌لریدن بیری طالب‌لر تامانیدن ییقیتیلدی و نتیجه‌ده کابل برق بیر مدت کیسیلدی. بیراق، بو مرته برق پایه‌لریدن باشقه بیرینی ییقیتیشی گه قوشیمچه، اولر امنیتی کوچلر بیلن توقنه‌شیب و پایه قیته قوریلیشی و کابل برقی باغله‌نیشی گه توسیق بولگن.
بغلان امنیتی مسؤوللریگه کوره، اوشبو ولایتده 700 برق پایه‌سی قوندیریلگن و بو پایه‌لرنینگ خوفسیزلیگی‌نی تأمین‌لش امنیتی کوچلر سانی آزلیگی باعث، قیین دیر.
