د پامیر ۲۱۷ قولاردو د درېیمې لوا قوماندان عباس توکلي سلاموطندار ته وویل چې پر طالبانو د افغان او بهرنیو ځواکونو په هوايي بریدونو کې ۳۳ طالبان وژل شوي او ۳۵ نور ټپیان دي.
نوموړی زیاتوي، د برکه ولسوالي پر ځینو سیمو د طالبانو بریدونه پر شا تنبول شوي او طالبان ورته د اوښتې سختې مرګژوبلې له کبله تېښتې ته اړ شوي دي.
د درېیمې لوا قوماندان وايي چې په وژل شویو کسانو کې ۷ چیچینیايي جنګیالي او ۱۲ د طالبانو د سرې قطعې قوماندانان شامل دي.
د نوموړي په وینا، د طالبانو دوه قوماندانان هم په یادو بریدونو کې ټپیان شوي او دغه راز د هغوی ډېر تجهیزات د امنیتي ځواکونو لاس ته ورغلي دي.
په همدې حال کې د برکه ولسوالي امنیه قوماندان محمدعلي ابراهیمي وايي چې په یادو نښتو کې ۱۰ امنیتي ځواکونو هم خپل ژوند له لاسه ورکړی او ۷ نور ټپیان شوي دي.
طالب ډلې تراوسه پهدې اړه رسنیو ته څه نهدي ویلي.
