د بدخشان ولایت یوشمېر اوسېدونکي چې د ناامنیو له امله د پنجشیر ولایت پریان ته را کډه شوي، د طالبانو له کړنو ترخه یادونه لري.
د کران ومنجان ولسوالي د اوشتي کلي اوسېدونکی سیداعظم وایي چې څه موده طالبانو بندي کړی و او پرون له څلورو مېرمنو سره له خپل کلي په تېښته بریالی شوی دی.
د سیداعظم په وینا، طالبان چې له پولې هاخوا تاجیکان، چچینایان، اوزبیکان او بدخشانیان هم ورسره دي، پر خلکو د هېڅ راز ظلم صرفه نه کوي.
بدخشاني کډوال دعوه کوي چې طالبان غواړي د خلکو په ایستلو سره د انجمن غاښي له لارې ځانونه پنجشیر ته ورسوي او دغه ولایت او کران او منجان سره پر پوله پراته نور ولایتونه ناامنه کړي.
د کران او منجان ولسوالي یوشمېر اوسېدونکي وايي، له ۴ میاشتني مقاومت وروسته چې طالبانو کلابند کړي وو، طالبانو د دوو قوماندانانو ملک او امام په ملاتړ پر دوی برید وکړ او د انجمن او اوشتي کلیو ۱۱ ځوانان يې ووژل او ۱۶ نور یې ټپیان کړل.
دوه کډوال عبدالملک او محمدموسی وايي، طالبانو د دوی ټول شته، څاروي او د کور نور توکي چور کړل او پر خپل سر به د خلکو کورونو ته ننوتل چې د سیمې پر اوسېدونکیو یې د ژوند ساحه را تنګه کړه.
اړوند مطالب:
د بدخشان بېځایه شوي: مرستې بسنه نه کوي
دغه کډوال ادعا کوي چې د بدخشان سیمهییزې ادارې په ۴ میاشتو کې چې دوی طالبانو کلابند کړي وو، نه یوازې دوی ته هېڅ پام و نهکړ او مرستې یې هم ورسره نهدي کړي. د سیمهییزو سرچینو د مالوماتو له مخې، د یادې ولسوالي جګړه یې قومي جګړه ښودلې ده.
خو د بدخشان د والي ویاند نېکمحمد نظري دا ادعا ردوي او وايي چې په یمګان ولسوالي کې د طالبانو د موجودیت او ډېرو واورو له کبله د لارو بندښت په سبب نهدي توانېدلي چې د کران او منجان امنیتي ستونزې حل کړي.
د نوموړي په وینا، د یمګان ولسوالي د طالبانو په لاس کې ده او په بدخشان کې سږنۍ بېسارې واورې ډېرې ستونزې پیدا کړي، خو په وینا یې، هڅه کوي چې له تخنیکي ډلې سره د ولسوالي د ادارې له لارې د خلکو ستونزې حل کړي.
د پنجشیر ولایت په پریان ولسوالي کې د بدخشان بېځایه شوي وايي، د ژوند له سختو شرایطو سره مخ دي او پر لوږې او تندې سربېره په سیمه کې د زهري حشرو موجودیت د دوی ژوند ګواښي.
