د جاغوري ولسوالي یوشمېر اوسېدونکو پرون ادعا وکړه چې د دغې ولسوالي د امنیې قوماندان او جنايي امر دوو ساتونکو پر دوو ښځو جنسي تېری کړی دی. ملي امنیت شورا نن اعلان وکړ چې د دې پېښې د څېړلو لپاره یې غزني ته پلاوی لېږلی دی.
ملي امنیت شورا ویلي، د ملي امنیت شورا دفتر د یاد پلاوي مشري کوي او د عسکري جرمونو پر وړاندې د مبارزې څارنوالي، د سیمهییزو ارګانونو خپلواکې ادارې، د ملي امنیت او د درنو جرمونو پر وړاندې د مبارزې ریاست استازي یې غړي دي.
د جاغوري لسګونو اوسېدونکو له یادې ادعا وروسته د ولسوالي د ودانۍ مخې ته اعتراض وکړ. د معترضانو اعتراض په تاوتریخوالي واوښت او په پایله کې یې یو کس ووژل شو او ۵ نور ټپیان شول. معترضانو ادعا کړې چې یاد دوه سرتېري یې پر دوو ښځو د جنسي تېري پر مهال نیولي دي.
کورنیو چارو وزارت پرون د یادې ولسوالي دوه امنیتي چارواکي له دندو ګوښه کړل.
د کورنیو چارو وزارت ویاند طارق ارین پرون وویل چې دواړه تورن سرتېري یې نیولي او څېړنې ترې روانې دي.
د ولسمشر سلاکار شاهحسین مرتضوي هم پرون جاغوري ولسوالي ته د پلاوي استول کېدو خبر ورکړی و. د پېښې عیني شاهدان وايي چې د خلکو د اعتراض پر مهال یو کس وژل شوی ۱۰ نور ټپیان دي.
