درې ورځې کېږي چې په تخار ولایت کې مخابراتي شبکې د مازدیګر له ۵ د سهار تر ۵ بجو فعالیت نه کوي.
دا پرېکړه وروسته له هغه کېږي چې طالبانو په خواجه بهاوالدین ولسوالي کې د اتصالات شبکې څلور غړي یرغمل کړل.
طالبانو همداراز د اتصالات مخابراتي شبکې د انتن ورکړې اړتیا وړ یوشمېر وسایل هم له ځانه سره وړي او ویلي یې دي چې د اتصالات شبکې دا څلور کارکوونکي یې ځکه بندیان کړي چې د دوی له اوامرو یې اطاعت نه کاوه.
د تخار یوشمېر اوسېدونکي وايي، له څو شپو راهیسې چې د خصوصي مخابراتي شبکو فعالیت درېدلی، د سلام دولتي سیمکارت بیه هم ډېره لوړه شوې ده.
د تخار د تالقانو ښار اوسېدونکي اسدالله تیمور او نعیم رحیمي وايي، د مخابراتي شبکو د فعالیت له بندېدو سره سم په دغه ولایت کې د یوه سلام سیمکارت بیه له ۵۰۰ تر ۱۰۰۰ افغانیو رسېدلې ده.
د دوی په وینا، د مخابراتي شبکو د نه فعالیت له کبله له ګڼو ستونزو سره مخ دي او مخابراتي شبکې او حکومت باید ژرترژره دا ستونزه حل کړي.
د دوی په خبره، د حکومتي چارواکو بېپلاني او مسوولیتونو ته نه پام د دې لامل شوی چې دغه ډله په تخار ولایت کې خپل پلانونه عملي کړي.
که څه هم د افغان بېسیم مخابراتي شرکت انټرنېت د شپې له لوري کار کوي، خو په تخار کې د دې مخابراتي شبکې یو کارکوونکی وایي چې تر راتلونکیو څو شپو د دې شبکې انټرنېټ هم پرې کېږي.
خو په تخار کې د مخابراتو ریاست چارواکي وايي چې د مخابراتي شبکو دغه پرېکړه د نه منلو او له قانون نه سرغړونه ده. چارواکي وايي، مخابراتي شبکو د خپلو چارواکیو په امر په شمالشرق زون کې خپل فعالیتونه د شپې له لوري درولي دي.
د تخار د مخابراتو رییس غفور تلاش وايي، په یوه غونډه کې یې مخابراتي شبکو ته ګوتڅنډنه کړې چې د شپې له لوري خپل فعالیت بند نه کړي.
د تخار امنیه قوماندان حشمت مسلم وايي، مخابراتي شبکې له هېڅ ډول جدي ګواښ سره مخ نهدي او د مخابراتي شبکو دغه پرېکړه سیاسي ده.
د نوموړي په خبره، د مخابراتي شبکو په یوه مرکزي سایټ کې کومه ستونزه چې د کوکچې شاوخوا ته پیدا شوې وه، د امنیتي ځواکونو له لوري حل شوې ده.
