سونگی نیچه آی جریانیده کابل و باشقه بیرقطار ولایت‌لرده قوراللی هجوم‌لر و سِرلی قتللر کوپه‌یگنی باعث، مملکت یشاوچی‌لری و چیت‌ایللیک‌لردن بیرقطاری اوز جانلرینی قولدن بیرگن.
اداری فسادگه قرشی کوره‌ش عدلی و قضایی مرکز ایشلاوچی‌لریدن ایکی ته‌سی جاری ییل سرطان آی نینگ 15- تاریخیده کابل شهری نینگ 5- امنیتی حوزه‌سیده ناتانیش قوراللی کیشی‌لر تامانیدن هجوم آستیگه قرار بیریلیب نتیجه‌ده اولردن 1 ته‌سی هلاک و باشقه 1 ته‌سی یره‌لنگن ایدی.
طالبان گروهی 3 عقربده غور مرکزی فیروزکوه شهریده انسان دوست‌لیک یاردملرنی اویغون‌لشترووچی بیر نهاد ایشلاوچی‌لری‌نینگ موتری اوستیگه هجوم قیلیب نتیجه‌ده مذکور نهاد ایشلاوچی‌لریدن ایکی عیال هلاک ایتیلگن ایدی، بیراق طالبان گروهی بوتوغریده فکر بیلدیرمه‌کن.
عقرب آی نینگ 16- تاریخیده پکتیا دستلبکی محکمه‌سی نینگ قاضی‌لریدن 4 ته‌سی لوگر ولایتیده طالبان تامانیدن اولدیریلدی.
سیاسی ایش بیلرمانلردن بیری وحید مژده 29 عقربده ناتانیش قوراللی کیشی‌لر تامانیدن کابل شهریده ترور ایتیلدی و بو واقعه طالبان گروهی تامانیدن قاره‌لندی.
جاری ییل قوس آی نینگ 3- تاریخیده کابل شهری نینگ 9- ناحیه‌سیده یوناما ایشلاوچی‌لری‌نینگ موتری اوستیگه ناتانیش کیشی‌لر قول بمی تشله‌دی و نتیجه‌ده بو نهاد چیت‌ایللیک ایشلاوچی‌لریدن بیری هلاک و باشقه ایکی ایچکی ایشلاوچیسی شامل 5 تینچ اهالی یره‌لندی.
اوشبو قوراللی هجوم‌لر دوامیده، ناتانیش قوراللی کیشی‌لر اوتگن "چهارشنبه" کونی جلال‌آباد شهری‌نینگ بیرینچی ناحیه‌سیده، جاپان‌لیک بیر یاردم بیرووچی نهاد ایشلاوچی‌لری نینگ انتقال بیره‌دیگن موتر اوستیگه هجوم قیلیب نتیجه‌ده، اوشبو نهاد باشلیغی دکتر تتسو اکامورا بو نهاد باشقه 5 افغانستان‌لیک ایشلاوچیسی بیلن هلاک ایتیلدی.
ایچکی ایشلر وزیرلیگی مسووللری نینگ ایتیشیچه، پولیس کوچلری بو واقعه‌لر عامللرینی قولگه آلیش اوچون سعی و حرکت قیلماقده. اولرنینگ ایتیشیچه، سِرلی قتللر جدی شکلده تیکشیریله‌دی و عامللری عدلی و قضایی نهادلرگه تاپشیریله‌دی.
ایچکی ایشلر وزیرلیگی سوزلاوچیسی‌نینگ اورین باسری مروه امینی نینگ ایتیشیچه، پولیس کوچلری سونگی واقعه‌لر عامللرینی قولگه آلیش اوچون سعی و حرکت قیله‌دیلر.
حربی ایش بیلرمانلردن بیری عتیق‌الله امرخیل نینگ قوراللی هجوم‌لرنی خطرلی هجوم عنوان قیلیب ایتیشیچه، تروریستی گروه‌لر تاثیرلی کیشی‌لرنی اولدیریش بیلن مملکت سیاسی و اقتصادی نظامی‌نی کوچ‌سیز قیلیش اوچون سعی و حرکت قیله‌دیلر.
مملکت‌ده هدفلی ترورلر و سیرلی قتللر کوپه‌یماقده. سیاستچیلردن بیرقطاری نینگ ایتیشیچه، اوشبو هجوم‌لر دشمن نینگ اوروش ریجه‌لریدن بیر بولیمی دیر.
