هلمند ولایتی موسی قلعه تومنینینگ دولتی ساختمانلریدن کوپیسی جنگری طالبلر قولی توشگن.
موسی قلعه تومنی باشلیغی محمد شریف خاننینگ سلاموطندار بیلن تیلفونی سوزلهشیب ایتیشیچه، اوتگن کیچه طالبلر هجوم اویوشتیریشلری بیلن پولیس باشقرمهسی، کسلخانه و مذکور تومن باشقرمه ساختمانینی اوز تصرفلریگه کیریتگنلر.
عین حالده، هلمند ولایتی کینگش امنیتی کمیتهسی عضوی بشیر احمد شاکر سلاموطنداربیلن تیلفون آرقهلی ایتیشیچه، نیچه ساعت امنیتی کوچلر بیلن توقنهشوو اوتکزیشلری بیلن نهایتده بوگون ایرتهلب ساعت 11 ده، موسی قلعه تومنی طالبلر تصرفیگه کیرگن. جناب شاکرنینگ کوپهیتیریشیچه، توقنه شوولر نتیجهسیده 70 گه یقین جنگری طالب هلاک و اولردن باشقه کوپیسی هم یرهلنگن.
امنیتی کوچلردن هم 15 کیشی هلاک بولیب، باشقه 100 گه یقینی تن جراحتی آلگن.
بوندن آلدین موسی قلعه تومنی باشلیغی هم یاردمچی امنیتی کوچلر و قورال اسلحه جهازلری مذکور تومنده ییتیب کیلمهگن صورتده، تیزلیکده سقوط قیلیشی ممکن دیب هشدار بیرگن ایدی.
عین حالده، عینی شاهدلرگه کوره، جنگری طالبلر توقنهشوولر جریانیده، موسی قلعه امنیت آمری پاچاگل بختیارنی توتقینگه آلیب، اوزلری بیلن آلیب کیتگنلر. اما حاضرگه قدر هلمند پولیس باشلیغی بوبارهده بیرنرسه دیمهگن.
باشقه بیرتاماندن ایسه، طالبلر سوزلاوچیسی قاری یوسف احمدینینگ رسانهلرگه پیام یوباریشی بیلن ایتیشیچه، موسی قلعه اوروشیده، پولیس کوچلریدن 20 تهسی هلاک بولگن و یوزلرچه اینگیل-آغیر قورال هم مذکور گروه قولیده قالگن.
اوتگن کونی هم طالبلر ینگی باشلیغی ملامنصور بویروغی بیلن نورزاد تومنیده اوزلریدن بیر حربی ژره کورستگن ایدیلر. اوتمیش 14 ییلده هلمند ولایتی طالبلر اصلی هدفلریدن بولیب کیلگن ایدی؛ بوگروه هلمندنی باسقینچگه آلیش اوچون کوپلب تلاش قیلگن ایدیلر.
ولایت نیچه تومنی جملهدن سنگین و نورزاد تومنلری، ییللرچه طالبلر قمراویگه قالگن ایدی.
