هراتده عیاللر خلق ارا فلمینینگ اوچینچی کورگیزمهسی ایریم مملکتلردن 300 فیلم اشتراکیده اوتکزیلدی. اوشبو کورگزمهده، 300 فیلم اورتهسیدن، 64 فیلم کورگزمه ساورینینینگ قولگه کیریتیش اوچون بیلشهدی.
کورگزمه کوزهتووچیلرینینگ ایتیشیچه، مذکور 64 فیلم افغانستان، ایران، روسیه، هندوستان، عراق، امیریکه، لبنان، میانمار، نیدرلند، استرالیا، سویس، هنگ کنگ، ناروی، جاپان، سنگاپور، ایتالیا، اسپانیا و باشقه نیچه مملکتدن سیلنگن. اولرگه کوره، اوشبو فیلملر اوچ کون کورگزمه ده قوییلهدی و اوندن کیین یخشی فیلملر افغانستان، امیریکه، ایران، هند و ایتالیا مملکتلریدن بولگن فعال عیاللر و سینماچیلر تامانیدن سیلهنیب تقدیرلنهدی.
خلق ارا عیاللر فیلمی اوچینچی کورگیزمه کوزهتووچیلریدن بیری عزیز دلدارنینگ ایتیشیچه، 300 فیلمدن 43 فیلم تشقریدن و 22 فیلم افغانستاندن ایریم بولیملرده سیلنگن و بیرینچی مقامدن اوچینچی مقامگچه بیلشهدی. اونگه کوره، اوشبو کورگزمه ساورینی افغانستانده توزهلگن فیلملرنی اینگ یخشی ایشلاوچیلری، سینماتوگرافی و عیال بیلن ایرکک رولینی اینگ یخشی صورتده اوینهگنلر و تشقی فیلملرگه اینگ یخشی انیمیشن، اینگ یخشی مستند و داستانیگه بیریلهدی.
جناب دلدارنینگ ایتیشیچه، اوشبو کورگزمه «رویا فیلم خانهسی» و «آرمانشهر بنیادی» تامانیدن ایریم بولیملرگه عیاللر رولینی برجسته قیلیش، افغانستان عیاللری بیلن دنیا عیاللری اورتهسیده علاقه باغلش و افغانستان سینماچیلری بیلن سینما یوکسلیشی خصوصیده یولگه قوییلگن.
افغانستان سینماچیلر بیرلیگی باشلیغی جوانشیر حیدری، بوندهی بیر کورگزمهلر یولگه قوییلیشینی جماعه و دولتچیلر اویغانیشی، شونینگدیک سینما یوکسلیشی خصوصیده اونملی دیب بیلهدی.
باشقه تاماندن، هرات والیسی محمدآصف رحیمی، اوشبو کورگزمهنی خوش قرشیلب ایتیشیچه، بوندهی بیر لایحهلر هنر و مدنیت یوکسلیشی توغریسیده ایجابی تأثیر تشلهیدی.
مملکت یازووچیلریدن بیری رهنورد زریاب، افغانستانده سینما وضعیتی خواطرلی دیب ایتیشیچه، اوشبو کورگزمه مملکتده سینما وضعیتی یخشیلنیشی خصوصیده بیر اورنک بولهآلهدی.
قوشیقچیلردن بیری فرهاد دریانینگ ایتیشیچه، افغانستان حاضرگی شرایطده کوپینچه قیینچیلیکلر بیلن روپهره بولیب تورگن؛ بیراق سینما هنری کوپینچهلرنینگ یورهگیگه یاغدولیک تشلهیدی.
اوشبو کورگزمه هراتده شوندهی حالده یولگه قوییلهدی کیم، حاضرگچه مذکور ولایتده هیچ بیر سینما فعالیت قیلمهیدی.
