اسلامی جنبش حزبی نینگ سوزلاوچیسی بشیراحمد تهینچ احمد ایشچیگه جنرال دوستم تامانیدن بولگن جنسی زورهوانلیکنی توطئه دیب بیلهدی. اونینگ ایتیشیچه، هربیر توطئه قانونی مرحلهنی اوتکزیشی لازم ایمس. او، قوم یاش اولوغلری مذکور دوسیه قومی جرگه گه حل ایتیلیشینی ایستهگنلرینی تیلگه آلگن.
بیراق حقوقی تحلیلچیلرنینگ ایتیشلریچه، دوستم و احمد ایشچی نینگ جنجالی قومی جرگهده حل ایتیلیشی، عدلی و قضایی نهادلر نی سوراق آستی آلیب کیتهدی.
افغانستان حقوقچیلری اتحادیهسی نینگ باشلیغی اجمل هودمن نینگ ایتیشیچه، مملکت اساسی قانونیگه مطابق هیچ کیمگه بونقه پیشنهاد قیلیش حقی بیریلمهگن و بونقه دوسیهلر قومی جرگه بیلن حل ایتیلیشی عدلی و قضایی نهادلرنی سوراق آستی آلیب بارهدی و قیینچیلیکلر بیلن روپهره قیلهدی.
اما حقوقچیلردن باشقه بیری فاروق بشرنینگ ایتیشیچه، اساسی قانونگه جمهور رییس جنایتلری بارهسیده فیصلهلر موجود، بیراق اورین باسرلری اوچون انیق بیرنرسه یازیلمهگن. اونگه کوره، جنرال دوستم نینگ دوسیهسی کوریب چیقیلمسدن آلدین جمهور رییس نینگ قانونگه قرشی عمللری بارهسیده بولگن ماده ستره محکمه گه تفسیر قیلیشگه یوباریلیشی لازم.
مذکور حادثه آرتیدن اروپا اتحادیهسی، امیریکه، بیرلشگن ملتلر تشکیلاتی، ملی کینگش انسان حقلر نهادلری جنرال دوستم نینگ احمد ایشچیگه قیلگن جنایتی جدی شکلده تیکشیریلیشینی سورهگنلر و حکومت اوشبو قضیه انیقلنتیریلیشی بارهسیده باشقرهلاوچیلیک ادارهسیدن هیأتنی ایشگه باشلتگن.
