هرات ولایتیده اون تورت ته تاش کاندن اون ایکّی تهسی محصولاتلری مملکتدن تشقریگه صادر ایتیلمهگن لیگی سبب اوز فعالیتلرینی توختگن.
مملکت غربیده حوزهوی کانلر ادارهسی نینگ رییسی عطاالله پوپلنینگ سلام وطندارگه ایتیشیچه، جمهور رییس مرمر تاشلر صادر ایتیلیشینی توختگندن بیری هرات ولایتیده کانلردن مرمر تاش قازیب چیقاریش کمهیب، بو ساحهده فعالیت قیله دیگنلر ایشدن قول کوتارگنلر.
جناب پوپلگه کوره، وضعیت شوندهی دوام تارتگن حالده، برچه کانلر فعالیتی توختهلهدی.
هرات چشت ولسواللیگی کانلریدن بیرینینگ مسوولی حبیبالله هوتکنینگ ایتیشیچه، قالگن ایکّی کاندن بیری هم ایشلب چیقاریش جریانینی توختهتیش عرفهسیده.
هراتده کانلر مسوولیدن باشقه بیری حمیداللهحبیبی، کانلرنی ایشلب چیقاریش جریانی توختهب قالمسلیگی اوچون حکومتدن همکارلیک سورهگن.
هرات کانلر و پطرولیم ادارهسینینگ باشلیغی عبدالجلیل الیاسنینگ بو باره ده سلام وطندارگه بیلدیریشیچه، بو قیینچیلیک حل ایتیلیشی اوچون ولایت کانچیلری اشتراکیده ییغین اوتکزهدیلر.
هراتده مرمر تاشلر ناقانونی صادر ایتیلیشی توغریسیده شکایتلر آشگن بیر پیتده جمهور رییس غنی اوتگن ییل جدی آییده بو ولایتگه سفر قیلیب، مملکتدن مرمر تاشلر خارجگه صادر ایتلیشینی توسیب قویدی.
