بوگون (یکشنبه 25- جوزا) ایچکی ایشلر وزیرلیگی سوزلاوچیسی طارق آرین خبری بیر ییغین اوتکزیب ایتیشیچه، آمریکا و طالبان گروهی آره‌سیده تینچلیک کیلیشوونامه امضالنگنیدن بویان، مذکور گروه مملکت تورلی ولایت‌لریده تینچ‌اهالی و امنیتی کوچلرگه قرشی 3 مینگ و 500 هجوم اویوشتیرگن.
اونگه کوره، طالبان یالغیز اوتگن بیر هفته‌ده 29 ولایتده امنیتی کوچلرگه قرشی 222 هجوم اویوشتیرگن کیم نتیجه‌ده، امنیتی کوچلردن 422 ته‌سی هلاک و یره‌لنگن.
آرین نینگ اورغولشیچه، طالبان اهالی و حکومت گه روانی باسیم کیلتیریش اوچون دین عالم‌لری گه قرشی هجوم قیله‌دی.
عین حالده، ملی خوفسیزلیک کینگش سوزلاوچیسی جاوید فیصل بو ییغینده ایتیشیچه، طالبان اوچ کون بیره‌م ده آتیش کیسین اعلام قیلگندن کیین، زوروانلیک میزانی نی کوپه‌یتیرگن.
فیصل گه کوره، طالبان زوروانلیک نی کوپه‌یتیریش گه علاوه، قطار ولایت‌لرده تینچ‌اهالی نی اولدیرگن.
طالب‌لرنینگ 5 مینگ محبوسی و افغانستان دولتی نینگ 1 مینگ محبوسی ایکی تامان قماقخانه‌لریدن قوییب یوباریلیشی تیزلیکده یکونله‌نیش بیرحالده، افغانستان تینچ‌اهالیسی و حربی‌لریگه قرشی طالبان هجومی کوپه‌یگن.
ملی خوفسیزلیک کینگشی نینگ معلوماتی اساسیده، حاضرگچه افغانستان حکومتی نینگ قماقخانه‌لریدن کمیده 300 طالبان محبوسی قوییب یوباریلگن و شونینگدیک طالبان قماقخانه‌لریدن افغانستان دولتی نینگ 300 دن آرتیق محبوسی قوییب یوباریلگن.
