اوتگن «چهارشنبه» کون، سردار محمد داوودخان کسلخانهسیگه اویوشتیریلگن هجومده 30 دن آرتیق کیشی هلاک و 50 دن آرتیق کیشی یرهلندی.
مدافعه وزیرلیگی سوزلاوچیسی جنرال دولت وزیرینینگ معلوم قیلیشیچه، بو هجومده 30 دن آرتیق کیشی هلاک بولیب و 50 دن آرتیق کیشی جراحتلنگن.
اوتگن «چهارشنبه» کون نیچه قوراللی هجومچی، کابلده جایلشگن اینگ کته حربی کسلخانه سردار محمد داوودخان کسلخانهسیگه هجوم قیلگن لر. اوشبو هجوم کمیده آلتی ساعت دوام ایتیب و هجومچیلر اولدیریلگنیدن کیین یکونلندی.
چهارشنبه کون کابلده سردار محمد داوودخان کسلخانهسیگه اویوشتیریلگن هجومگه اشارهقیلگن قطار سیاسی و حربی ایش بیلرمانلرنینگ ایتیشیچه، خوفسیزلیک ادارهلریدهگی موجود فساد، مدیریت سیزلیک، تیکشیروو یوقلیگی، مصلحتگرالیک و سلیقهیی حرکتلر سبب، افغانستان قانلی واقعهلرگه گواه بولهدی.
حربی ایش بیلرمانلردن بیری عتیقالله امرخیلنینگ سلاموطندارگه ایتیشیچه، افغانستان تیزیمیدهگی ایشانچسیزلیک و سلیقهیی حرکتلر اورتهدن کوتریلگونگهقدر، مملکتده امنیتی وضعیت یخشی بولمهیدی.
جناب امرخیلگه کوره، حاضرگی شرایطده شخصی منفعتلر ملی منفعتلردن اوستون تورهدی و کیشیلر، واسطه و سلیقه اساسیده، خوفسیزلیک ادارهلری، دفاعی و امنیتی کوچلر تشکیلاتیده تعیین ایتیلهدی.
جناب امرخیلنینگ ایشانچیگه کوره، خوفسیزلیک کوچلریدن بیرقطاری، حکومت باشلیغلری و خوفسیزلیک ادارهلر مسؤوللرینینگ بویروغینی قبول قیلمهیدیلر.
عین حالده، سیاسی ایش بیلرمانلردن بیری فردوس کاوشنینگ ایشانچیگه کوره، افغانستانده سیاسی مصلحت رواجلنگن و شو یوزدن فاسد، ایشسیز و ظرفیتسیز رسمیلر تیرگاوگه آلینمهیدی.
جناب کاوشگه کوره، اوتگن کون یوز بیرگن واقعه خصوصیده، 400 بسترلیک کسلخانه بوییچه مدافعه وزیرلیگی و گارنیزیون کشفی باشلیغلری تیرگاوگه آلینیشی کیرهک و یوز بیرگن مصیبتگه قرهگنده، وزیر وظیفهسیدن چیکلهنیشی لازم.
اوشبو سیاسی ایش بیلرمانگه کوره، سردار محمد داوودخان کسلخانهسیگه اویوشتیریلگن واقعه توغریسیده بیفرق یاندهشگن مسؤوللر تیرگاوگه آلینمهگن صورتده، اهالی آرهسیده حکومت ایشانچی کمهییشی ممکن.
بیراق، سیاسی ایش بیلرمانلرنینگ بیاناتلرینی رد قیلگن مدافعه وزیرلیگی سوزلاوچیسی دولت وزیرینینگ سلاموطندارگه ایتیشیچه، مذکور وزیرلیکنینگ فعالیت لری شفاف و فساد آلدی آلینیشی خصوصیده، سعی و حرکت دوام ایتماقده.
اوتگن «چهارشنبه» کون باشکینتده اویوشتیریلگن هجوم مملکتده کوپینچه عکسالعمللرگه روپهره بولدی.
افغانستان ملی خوفسیزلیک عمومی ریاستی سابق باشلیغلری امرالله صالح و رحمتالله نبیلنینگ اوز فیسبوک صحیفهلریده یازیشلریچه، امنیتی ادارهلر انقراضگه اوچرهگن و حکومت بلند مرتبهلی رسمیلری، بیر- بیراویگه قرشی فتنهچیلیک قیلهدیلر.
