هلمند ولایتی نهر سراج ولسواللیگینینگ یشاووچیلری، یوزلب جنگری طالب اوتگن کیچه ساعت 12 ده مذکور ولسواللیککه هجوم قیلگن دیگنلر.
اولرنینگ ایتیشیچه، جنگری طالبلر همده ملی کوچلر اورتهسیده یوز بیرگن اوروشده ملی کوچلرنینگ 30 حربیسی حیاتدن کوز یومگن و 3 پوسته ایسه بوتونلی اورتهدن کیتگن.
مذکور پوسته نهرسراج ولسواللیگینینگ عمومی یولیده جایلشگن.
قوراللی طالبلرنینگ سوزلاووچیلریدن بیری قاری یوسف احمدیگه کوره، اوروشنی هنوز هم دوامی بار. اونگه کوره، جنگده ملی کوچلرنینگ 40 حربیسی اولدیریلگن. شونینگدیک قاری یوسف اوروشده ملی کوچلرنینگ 30 ته قورال اسلحهسینی قولگه کیریتگنلیکلرینی ادعا قیلگن.
هلمند ولایت امینه قوماندانلیگی سوزلاووچیسی شاه محمد آشنا هجومنی تصدیقلب، اما تلفات بارهسیده بیرار انیق معلومات بیرمهگن.
ایتیلیشیچه، جنگریلر همده ملی کوچلر اورتهسیده هنوز اوروش جریانی بار.
باشقه تاماندن، قوراللی طالبلر اوتگن کیچه هرات ولایتینینگ گلران ولسواللیگیده بیر پوستهگه هجوم قیلگنلر.
مملکت غربیده جایلشگن 705 ارکان زون رییسی گلبدین الکوزینینگ سلاموطندارگه ایتیشیچه، مذکور هجوم ولسواللیکنینگ چهارتخته قیشلاغیده یوز بیرگن.
جناب الکوزیگه کوره، دستلب ملی کوچلرنینگ ایکی نفری قوراللی طالبلرگه قوشیلگن سونگ جنگریلر مذکور پوستهگه هجوم قیلیب ملی کوچلردن تورت حربینی اولدیرگن. عین حالده، او طالبلرگه قوشیلگن مذکورایکی حربی عسکر تورت همکارینی اولدیرگنلیکده قولی بارلیگی یا یوقلیگی توغریسیده تیرگاو باشلنگن دیگن.
حادثهنی تصدیقلگن گلران ولسوالی اسدالله نورزاییگه کوره، مذکور حربی عسکرلر قوراللی طالبلر بیلن نیچه ساعت اوروش آلیب بارگندن سونگ هلاک بولگنلر. شونینگدیک جناب نورزایی طالبلر تورت حربینی اولدیرگن دیگن. ایتیلیشیچه، اوروشده باشقه ایکی عسکر تن جراحتی آلگن.
طالبلر تامانی هنوزگچه بوتوغریده هیچ نرسه دیمهگن.
نورزاییگه کوره، چهارتخته گلران ولسواللیگینینگ اوزاق منطقهسیده جایلشگن قیشلاقلردن سنهلهدی و طالبلر مذکور منطقهده کوزگه کورینرلی درجهده فعالیت آلیب بارهدی.
