ایران ده‌گی افغانستان فقرالریدن 530 مینگ کیشی یشش مدتی یکونلنگن و حاضرگه قدر بو کیشی‌لر تقدیری بیللی ایمس.
ایراننی افغانستان ده‌گی ایلچی‌لیک اورین باسری علی‌رضا حاجی‌زاده‌نینگ 30- جوزا ده مهاجرلر خلق ارا کونی مناسبتی بیلن اوتکزیلگن ییغینده ایتیشیچه، قاچقین‌لر یشش مدتی قنقه‌لیگی باره‌‍سی‌ده ایران رسمی‌لری و مذکور مملکت ده‌گی افغانستان ایلچی‌لیگی بیلن آلینه‌دیگن اولتیریشده قرار قیلینه‌دی.
شونینگ‌دیک جناب حاجی‌زاده‌نینگ مذکور ییغینده ایتیشیچه، ایران، افغانستان قاچقینلری‌گه قولی‌لیک یشش یره‌تیش اوچون سعی و حرکت قیله‌دی.
انه شونده‌ی، مهاجرلر و باش پناه ایزلاوچیلر وزیری سیدحسین عالمی بلخی، بو ییغینده سوزچه چیقیش قیلیب ایتیشیچه، ایران ده‌گی افغانستان مهاجرلری‌نینگ یشش مدتی‌گه آلتی آیدن آرتیق قیته تیکله‌نیشی‌گه امید بیلدیره‌دی.
ایتیلیشیچه، ایران ده 530 مینگ کیشی‌نینگ یشش مدتی جاری ییل سرطان آیی‌نینگ بیرینچی کونیده یکونلنه‌دی.
مهاجرلر و باش پناه ایزلاوچیلر وزیری‌گه کوره، حاضرگی کونلرده افغانستان فقرالریدن 840 مینگ ته سی قانونی صورتده ایران‌ده حیات کیچره‌دی و کمیده باشقه بیر میلیون کیشی حجت‌سیز و ناقانونی شکلی‌ده مذکور مملکت‌ده یشب بارماقده.
ایتیلیشیچه، پاکستان‌ده هم بیر یریم میلیون کیشی قانونی صورتده و بیر میلیون کیشی ناقانونی صورتده یشه‌یدی و افغانستان رسمی‌لری نیچه مرته اولرنینگ روی خط‌گه آلینیشی‌گه پاکستان رسمی‌لری بیلن اوچره‌شگن.
قشاق‌لیک، ایش سیزلیک و ناتینچلیکلر سبب مملکت فقرالریدن کوپینچه‌سی تشقی مملکت‌لرده مهاجر بوله‌دی.
