افغانستان ملی خوفسیزلیک باشلیغی، مدافعه و ایچکی ایشلر وزیرلری، نمایندهلر کینگشیدن کوپینچه آواز قولگه کیریتیب اوز مقاملریده قالدیلر.
بوگون «دوشنبه» افغانستان ملی خوفسیزلیک باشلیغی معصوم استانکزی، مدافعه وزیری عبدالله حبیبی و ایچکی ایشلر وزیری تاجمحمد جاهد، سونگی ناتینچلیکلر و سردار محمد داوودخان کسلخانهسیگه اویوشتیریلگن هجوم خصوصیده، نمایندهلر کینگشی تامانیدن استیضاح ایتیلگن ایدیلر.
نمایندهلر کینگشینینگ بوگونکی ییغینیده، نمایندهلردن 205 کیشی حاضر بولگن و جملهدن 118، 50+1 آواز تعیین ایتیلدی.
آواز بیریش نتیجهسیده، ایچکی ایشلر وزیری تاجمحمد جاهد 120 ایجابی و 75 سلبی آواز، مدافعه وزیری عبدالله حبیبی 106 ایجابی و 88 سلبی آواز و ملی خوفسیزلیک باشلیغی معصوم استانکزی 129 ایجابی و 66 سلبی آواز قولگه کیریتیب اوز مقاملریده قالگنلر.
ییغین اداغیده، نمایندهلردن بیرقطارینینگ ایتیشیچه، مملکتدهگی موجود شرایطگه قرهگنده، امنیتی رسمیلرنی ایشدن آلیش مملکت منفعتیگه ایمس دیر.
اولرنینگ ایتیشیچه، تیزلیکده افغانستان دفاعی و امنیتی ادارهلرینی تیکشیریش اوچون اروپا بیرلشمهسی و ناتو تشکیلاتی تامانیدن قوشمه بیر هیأت کابل کیلهدی و بو اوچرهشووده افغانستانگه بیرهدیگن یاردملری دوامی خصوصیده سوز بیریشلری ممکن و بو شرایطده امنیتی رسمیلر، سلبی آواز آلمسلری لازم.
سونگی پیتلرده، امنیتی رسمیلر استیضاح ایتیلمهسی خصوصیده، جمهور رییس، نمایندهلر کینگشی بیلن نیچه ییغین اوتکزگن و اولردن امنیتی وضعیتگه قرهگنده، دولت کابینهسینی بوشتمهسلرینی سورهگن.
بوندن آلدین، نمایندهلر کینگشینینگ ایتیشیچه، امنیتی رسمیلر، نمایندهلر کینگشی تامانیدن ایشدن آلینگن صورتده، پارلمان جمهور رییس تامانیدن بیکار قیلینیشی خصوصیده، آگاهلنتیریلگنلر.
