طالبان سیاسی دفتری سوزلاوچیسی سهیل شاهین نینگ ایتیشیچه، حقانی گروهی نینگ حاضرگی رهبری سراجالدین حقانی و قطرده بو گروه نینگ سیاسی دفتری اورینباسری ملاعبدالغنی برادر گه قرشی چیکلاولر ینگی بیر موضوع ایمس.
جناب شاهین پاکستان تامانیدن حقانی ترماغی و طالبان گروهی رهبرلیک اعضالریدن قطاری گه چیکلاو وضع قیلینگنی گه عکسالعمل بیلدیریب سلاموطندارگه ایتیشیچه، بو چیکلاولر نیچه ییل آلدین بیرلشگن ملتلر تشکیلاتی نینگ خوفسیزلیک کینگشی تامانیدن بو گروه نینگ رهبرلیک اعضاسی گه وضع قیلینگن ایکن.
جناب شاهین گه کوره، اوتمیشلرده اوشبو گروه نینگ رهبرلیک اعضالری باشقه مملکتلرگه سفر قیلیشی گه رخصت بیریلمهگن ایکن، بیراق حاضر موقتی شکلده قطار مملکتلرده سفر قیله آلهدیلر.
پاکستان تشقی ایشلر وزیرلیگی نینگ گزارش بیریشیچه، اسلامآباد قطرده طالبان سیاسی دفتری اورینباسری ملاعبدالغنی برادر و حقانی ترماغی نینگ حاضرگی رهبری سراجالدین حقانی و شونینگدیک مذکور گروهلرنینگ باشقه رهبرلیک اعضالری گه قرشی مالی چیکلاو یرهتیلگنیدن خبر بیردی.
مذکور چیکلاو اساسیده، مذکور کیشیلرنینگ سرمایهلری ضبط ایتیلیشی ممکن، سفرلریگه چیکلاو یرهتیلهدی و شونینگدیک قورال تاشیش گه رخصتلری یوق.
حقانی ترماغی نینگ رهبری سراجالدین حقانی نینگ آتی بیرلشگن ملتلر تشکیلاتی نینگ قاره رویخطی گه قرار تاپگن.
جمهورلیک ریاستی نینگ ایتیشیچه، ترورچیلیککه قرشی کورهش عملی اقداملر ایستهیدی و پاکستان نیچه ییل آلدین طالبان و حقانی ترماغی گه قرشی چیکلاو یرهتیشی کیرهک ایدی.
جمهوررئیس سوزلاوچیسی اورینباسری دواخانه مینهپال نینگ سلاموطندارگه ایتیشیچه، «افغانستان حکومتی ییللر آلدین بو چیکلاولر یرهتیلیشی نی سورهگن ایدی، ترورچیلیک نینگ اویهلری پاکستان ده دیر و اولر بو مملکت تامانیدن حمایت بولهدی. شو یوزهدن افغانستان دولتی پاکستان دن هردایم بو توغریده جدی اقدام قیلیشی نی سورهگن ایدی.»
پاکستان بو چیکلاولرنی میلادی ۲۰۱۵- ییل بیرلشگن ملتلر تشکیلاتی نینگ ۲۲۵۵- قطعنامهسی اساسیده طالبان گروهی اعضالری و حقانی ترماغی گه وضع قیلگن.
پاکستان نینگ آتی کمیده ایکی ییل آلدین مالی اقدام خاص گروهی نینگ خاکستری رویخطی ((FATF گه سیغدیریلدی.
مالی اقدام خاص گروهی جاری میلادی ییل نینگ آخرلریده ترورچیلیک که قرشی خصوصیده پاکستان نینگ حرکتلرینی تیکشیریش گه قرار قیلگن.
