اوغیرلنگن 31 یولاووچی نینگ خانهدانی و مدنی جماعهچیلیک نینگ اونلب فعالی اوتگن کون کابل نینگ زرنگار پارکیده اعتراض بیلدیریب، حکومت اوغیرلنگنلر اوچون فرقسیز یاندهشه یاتگن لیگی سبب تحصن قیلگنلر.
اعتراچیلر، بیر ییریم آیدن بیری کوزلری عزیزلری یولیده بولیب، اولر کیلیشینی کوتیشلرینی ایتگنلر. اما، اوغیرلنگنلر آزاد ایتیلیشی اوچون حکومت سیره هم اعتبار بیرمهگن.
تحصنده اشتراک قیلگن اعتراضچیلردن معصومه، حکومت رهبرلریدن اوغیرلنگنلر تیزلیکده آزاد ایتیلیشینی سوره گن. معصومه اوغیرلنگنلردن ایکّی نفری ایناغهسی بولگن لیگینی بیان قیلگن. بوغزی ییغیگه تولگن معصومه نینگ سوزلریگه کوره، هر قندهی تاووش قولاغیگه کیلیش بیلن، ایناغهسی فکریگه چومیلهدی و ایناغه سینی کوریش اوچون لحظهلرنی حساب قیلهدی.
تحصن قیلیب اعتراض بیلدیرگن حسینعلی نینگ ایتیشیچه، اوغلی اوغیرلنگنلرنینگ ایچیده، 42 کوندن بیری اونی حقیده هیچ قندهی خبر یوق. حسینعلی، دولت اوغیرلنگنلر بارهسیده هیچ بیر معلومات بیرمهدی دیگن. شونینگدیک تحصنده اشتراک قیلگنلردن احمدشاه استانکزی نینگ بیلدیریشیچه، حکومت ایستکلریگه جواب قیترمه گونگه قدر، تحصنلریگه دوام ایتیریشلری توغریسیده تاکیدله گن.
اعتراضچیلر، بیر اعلامه صادر قیلیش بیلن افغانستان حکومتیدن 31 مسافر آزاد ایتیلیش مسالهسی دولت قیلهجک بیرینچی ایشی بولیشینی طلب قیلگنلر. عین حالده، حکومتنینگ رهبرلری اوغیرلنگنلر آزاد ایتیلیشی اوچون بیفرق قالمس لیکلریدن سوز بیرگنلر.
ملی بیرلیک حکومتینینگ اجراییه باشلیغی داکتر عبدالله عبدالله نینگ ایتیشیچه، یولاووچیلر آزاد ایتیلیشی اوچون سعی و حرکتلر بولگن، اما امنیتی قیینچیلیکلر و مسافرلرنینگ جانی مسالهسی اوچون حکومت توگل معلومات لرنی فاش قیله آلمیدی.
