هرات محلی مسووللری نینگ ایتیش‌لریچه، اوزینی اوغیرلب، عایله‌سیدن پول ایسته‌گن بیر کیشی امنیتی کوچلر تامانیدن قولگه آلینگن. بوگون "پنجشنبه" هرات حاکمی اورین باسری نوراحمد حیدری نینگ خبری بیر ییغینده ایتیشیچه، مذکور قولگه آلینگن کیشی نینگ آتی عبدالبصیر دیر و او، صراف‌لیک قیله‌ریکن.
اونینگ ایتیشیچه، عبدالبصیر نیچه پیت آلدین اوزینی کابل شهریده یاشیریب و عایله‌سیگه اوغیرلنگنی‌نی بیلدیرگن ایدی. مذکور کیشی ملی خوفسیزلیک هماهنگ‌لیگی بیلن کابلدن قولگه آلینگن و اوندن سونگ هرات‌گه انتقال بیریلگن.
جناب حیدری نینگ کوپه‌یتیریشیچه، اوشبو کیشی عایله‌سیدن پول ایسته‌گن و عایله‌سی اونینگ قوییب یوباریلیشی اوچون نیچه مرته امنیتی نهادلرگه مراجعت قیلیب و ناراض‌لیک بیلدیرگن ایدی.
بیراق، عبدالبصیر نینگ ایتیشیچه، صراف‌لیک معامله‌سیده زیان کورگن و پول‌لرینی اوغیری‌لر آلیب کیتگن، انه‌شو سبب، اوغیرلاوچیلیک بهانه‌سی بیلن عایله‌سیدن پول آلیش‌نی ایسته‌گن.
اونینگ ایتیشیچه، بوندن آلدین هم اوزنی اوغیرلب و قوییب یوباریلیشی‌گه قرشی 1 میلیون افغانی عایله‌سیدن آلگن ایدی، بیراق امنیتی منبع‌لرنینگ ایتیش‌لریچه، او عایله‌سیدن 200 مینگ دالر ایسته‌گن.
هرات محلی مسووللری نینگ ایتیش‌لریچه، قانون گه کوره، مذکور کیشی کمیده 16 ییل محبوس بولیشی ممکن.
