ایران نینگ یزد ولایتیده مذکور مملکت نینگ عسکرلری تامانیدن اوت بیریلگن افغانستانلیک مهاجرلرنینگ عایله‌لری عدالت سوره‌یدی.
یزد شهریده اوت بیریلگن افغانستانلیک مهاجرلرنینگ عایله‌لری فاریاب ولایتی نینگ مرکزی میمنه شهریده توپله‌نیب حکومت دن بو قضیه‌نی جدی شکلده تیکشیریب و اولگن‌لرنینگ جسدلری بیلن یره‌لنگن‌لرنی مملکت گه انتقال بیریشی‌نی طلب قیلیشگن.
افغانستانلیک مهاجرلرنینگ عایله‌لرینی ایتیش‌لریچه، حاضرگه‌قدر یزد شهریده یوز بیرگن واقعه جسدلری و یره‌دارلری ولایت‌لری گه انتقال بیریلمه‌گن.
اوشبو عایله‌لرنینگ ایتیش‌لریچه، بو واقعه قربانلریدن 6 ته‌سی فاریاب ولایتی نینگ قیصاری تومنیدن بولگن و بو آره‌دن 1 ته‌سی جان بیرگن و باشقه 5 ته‌سی آغیر یره‌لنگن.
مینیلگن موتری ایران عسکرلری تامانیدن اوت بیریلگن حکمت‌الله نینگ آته‌سی امیر محمدنینگ ایتیشیچه، حکمت‌الله بیش یاشرلیگی‌ده آنه‌سیز بولگن و او اوغلی‌نی آنه‌سیز مینگ‌لرچه درد و مشقت بیلن کته قیلگن.
امیرمحمد نینگ ایتیشیچه، اوغلی ینگی‌لیک ده 14 یاشر بولگن ایکن و ایران عسکرلری گوشت کبی کباب ایتگن.
اونینگ سلام‌وطندارگه ایتیشیچه، حکمت‌الله عایله‌سی نینگ قرضی‌نی اوزیش نیت ده ایران کیتگن، بیراق بو آرزویی بیلن اوت گه یانگن.
حکمت‌الله نینگ آته‌سی امیرمحمدنینگ ایتیشیچه، ایران عسکرلری 7 کوندن بویان اوغلی نینگ جسدی نی یقین‌لری گه تاپشیرمه‌گن. او، حکومت دن حکمت‌الله نینگ جسدی و همراهلرینی مملکت گه انتقال بیریشی‌نی طلب قیله‌دی.
حکمت‌الله نینگ جسدی حاضرگه‌قدر ایران عسکرلری نینگ قولیده بولگن، بیراق آته‌سی امیرمحمد، اوغلی نینگ جنازه‌سینی توپراققه تاپشیریش اوچون هیچ نرسه‌سی یوقلیگی‌نی ایته‌دی.
یزد شهریده یوز بیرگن واقعه قربانلریدن بیری نینگ تاغه‌سی جمعه خان نینگ ایتیشیچه، اولر یالغیز بیر لقمه نان تاپیش اوچون ایران کیتگن ایکن، بیراق موترلری ایران عسکرلری تامانیدن اوت بیریلگن.
عین دمده، فاریاب حاکمی سوزلاوچیسی جاوید بیدارنینگ سلام‌وطندارگه ایتیشیچه، بو واقعه جدی شکلده تیکشیریله‌دی.
افغانستانلیک مهاجرلر مینیلگن موتر اوتگن هفته چهارشنبه کون ایران نینگ یزد ولایتیده مذکور مملکت نینگ عسکرلری تامانیدن اوت بیریلدی و بو واقعه مملکت ده جدی عکس‌العمل‌لرگه روپه ره بولدی. مملکت نینگ مدنی فعاللری و یشاوچیلریدن بیرقطاری، ایریم ولایت‌لرده ناراضیلیک نمایش یولگه قوییب ایران پولیسی نینگ بو ایشی‌نی قتیق قاره‌لب و بو قضیه جدی شکلده تیکشیریلیشی‌نی طلب قیلیشگن.
