د امریکا ولسمشر بارک اوباما په کندوز کې د بې پولو ډاکټرانو پر روغتون د ناټو ځواکونو هوايي برید یوه «تراژيدي» ګڼي او وايي، چې د دوی دفاع وزارت په دې اړه پراخې څېړنې پیل کړي دي.
د ملګرو ملتونو مشر بانکي مون هم دغه پېښه غندلې او په بې پري توګه یې د دغې پېښې په اړه د څېړنو غوښتنه کړې ده.
د جمعې پر شپه د (اکټوبر په ۲مه) ناټو ځواکونو پر دغه روغتون د یو هوايي برید پر مهال د بې پولو ډاکټرانو د سازمان د ۱۲ ډاکټرانو په ګډون ۱۹عام وګړي او ۷ تنه ناروغان وژلي او ۳۷ تنه نور یې ټپیان کړي دي.
ولسمشر اوباما په یوه خبرپاڼه کې ویلي، مخکې له دې چې د دې پېښې په اړه پرېکړه وشي؛ ښه به وي، چې د پلټنې پایلې مشخصې شي.
د بې پولې خبریالانو سازمان دغه حمله یو «وحشیانه» عمل ګڼلی او ویلي یې دي، چې د دغه برید له امله د روغتون ودانۍ ته ډېر زیان رسېدلی دی. دغه سازمان د پېښې د څېړلو پر وخت د بې پري توب غوښتنه کړې ده او ویلي یې دي، چې په دې اړه دې پوره توضیحات ورکړل شي.
د بې پولې ډاکټرانو د سازمان پر خبره، دغه حمله وروسته له هغې شوې، چې دوی د جي پي اېس له لارې ناټو او افغان ځواکونو ته د دغه روغتون د موقعیت په اړه معلومات ورکړي وو.
دغه بريد په داسې وخت کې شوی دی، چې روغتون له ناروغانو او ډاکټرانو ډک و. د دغه سازمان مسولین وايي، چې ناټو ځواکونو د روغتون اصلي ساختمان، د جدي مراقبت برخه، عاجل خونه او د فزیوترافۍ برخه په پرلپسې ډول د برید هدف ګرځېدله ده، په داسې حال کې چې د ساختمان نورې برخې په بشپړ ډول روغې پاتې دي.
له بل لورې د ملګرو ملتونو د بشر حقونو سازمان وايي، که چېرې د کندوز پر روغتون دغه برید په قصدي ډول شوی وي؛ نو کېدلی شي، چې دغه برید یو جنګي جنایت وشمېرل شي.
یوه اونۍ مخکې د طالبانو یوې ډلې په یوه غورځنګي برید کې د کندوز ښار او د دغه ښار ادارې ونیولې، خو افغان امنیتي ځواکونو د ناټو ځواکونو په مرسته له درې ورځو وروسته د دغه ښار زیاتې برخې بېرته ونیولې.
ویل کېږي، چې د المان یو شمېر نظامي ځواکونه د افغان ځواکونو د مرستې له پاره د طالبانو نه د کندوز د بېرته نیولو له پاره افغانستان ته رالېږل شوي.
