انسان حقوقی ایرکین کمیسیونی مسؤول‌لری‌نینگ ایتیشیچه، اولرنینگ ینگی تیکشیروولریگه کوره، اوتمیش‌گه نسبتن باله‌لرگه قرشی زوره‌وانلیک میزانی آشگن. اولرنینگ ایتیشیچه، مملکت‌ده اورته شکلده 300 مینگ باله آغیر ایشلر بیلن چالیشه‌دی.
بوگون «سه‌شنبه» خبری بیر ییغینده نطق سوزله‌گن انسان حقوقی ایرکین کمیسیون کمیشنری ثریا صبح‌رنگ نینگ ایتیشیچه، اولرنینگ باله‌لرگه قرشی یوز بیرگن زوره‌وانلیک توغریسیده‌گی تیکشیروولریده 12 دن باشلب 18 یاشرگچه باله‌لردن سوره‌لگن.
خانم صبح‌رنگ گه کوره، اولرنینگ بو تیکشیروودن قولگه کیریتگن معلومات‌لریگه قره‌گنده، باله‌لردن 38% زوره‌وانلیک‌لردن کوپینچه‌سی عایله‌لر تامانیدن یوز بیریشینی بیلدیرگن و بو باله‌لردن 13% زوره‌وانلیک‌نی مکتب‌لرگه نسبت بیرگن و باشقه بیر قطاری‌نینگ ایشانچی‌گه کوره، اولرگه قرشی زوره‌وانلیک اجتماع و ایش محیطی‌ده یوز بیره‌دی.
خانم صبح‌رنگ نینگ ایتیشیچه، اوشبو تیکشیروو 28 ولایت‌ده 5700 باله بیلن یوزمه یوز شکلده عمل‌گه آشیریلگن و اولردن 58% اوغیل‌لر و 42% قیزلر تشکیل بیره‌دی.
انسان حقوقی ایرکین کمیسیونی‌نینگ گزارشی‌نی بیر قسمی‌ده کیلیشیچه، اوتگن بیر ییل‌ده بیرقطار باله‌لر قوشنی مملکت‌لرگه سفر قیلگن چاغلریده تورخم، اسلام‌قلعه و زرنج چیگره‌لریده جنسی زوره‌وانلیک، بدرفتارلیک و کلتک‌لنیش‌نی تجربه قیلگن‌لر.
انسان حقوقی ایرکین کمیسیونی‌نینگ باله‌لرنی اویغونلشتیرووچی مسؤولی نجیب‌الله زدران‌نینگ ایتیشیچه، اولرنینگ اجتماعی ایشلر وزیرلیگی و یونسف اداره‌سی بیلن بولگن قوشمه تیکشیروولری اساسیده، افغانستانده چمه‌سی 3000 باله آغیر ایشلر بیلن شغللنه‌دیلر.
انسان حقوقی ایرکین کمیسیونی مسؤول‌لری‌نینگ ایتیشیچه، حکومت سیاسی قره‌مه قرشی‌لیک‌لر و امنیتی قیین‌چیلیک‌لر بیلن بند بولگنی سبب، باله‌لرنی ایسدن چیقارگن.
