بغلان ولایتینینگ بُرکه تومنی یشاوچیلریدن کوپینچهسی ایکینچی بولگن و اولردن بیرقطاری، مذکور تومن امنیه قومندانی و ناقانونی قوراللی قومندانلردن بیرینی، اهالیدن زورده عشر و زکات ییغیشگه عیبلهیدیلر.
اوشبو یشاوچیلر، بُرکه تومنینینگ شرشر، سقاب، لغک و قرهچهیی قیشلاقلریدن بولیب سلاموطندار بیلن اوتکزگن صحبتلریده ایتیشلریچه، اولر عشر و زکاتلرینی بیرمهگن صورتده، مذکور تومن امنیه قومندانی تامانیدن یمان واقعهگه روپهره بولیشلری خصوصیده آگاهلنتیریلگن.
یشاوچیلرگه کوره، شونینگدیک ناقانونی قوراللی قومندانلردن بیری حکیم، بُرکه امنیه قومندانی بیلن جنجل قیلگنی باعث، اهالیدن عشر و زکات بیریشلرینی سورهگن. اوشبو تومن یشاوچیلرینینگ ایتیشیچه، ایکی قومندان حاضرگچه نیچه مرته عشر و زکات اوستیگه توقنشگنلر.
بغلان امنیه قومندانی حبیب گلبهاری، بُرکه تومنی یشاوچیلریدن عشر و زکات ییغیشنی تصدیقلهیدی، بیراق ایتیشیچه، بُرکه امنیه قومندانینینگ بو ایشگه قولی یوق دیر. جناب گلبهاریگه کوره، اوشبو تومن یشاوچیلریدن کیمسه زورده عشر آلمهیدی و اولر امنیتلری تأمین ایتیلیشی اوچون، مذکور تومن محلی قومندانلریدن بیری ملاامیرگه عشر بیرهدیلر.
عین حالده، بغلان یشاوچیلریدن بیرقطارینینگ ایتیشلریچه، محلی قومندانلرگه قوشیمچه، قوراللی طالبلرهم دندغوری، دندشهابالدین و دهنۀ غوری، مرکزی بغلان، بُرکه، تالهو برفک و دوشی تومنلرینینگ ایریم قسمتلریده حربی جهازلرینی تأمین ایتیش اوچون، اهالیدن زورده عشر و زکات آلهدیلر.
