بدخشان ولایتیده ناگرانلر و شهیدلرنینگ عایله اعضالریدن بیرقطارینینگ ایتیشیچه، بیر-ایکی ییلدن بویان حقوقلرینی آلمهگنلر و حقوقلرینی قولگه کیریتیش خصوصیده آیلرچه کوتیب قیلگن سعی و حرکتلری نتیجهسیز قالگن.
بدخشان ولایتی کینگش اعضاسی فرحناز پامیرینینگ ایتیشیچه، شهیدلر عایلهلری و ناگرانلرنینگ حقوقلرینی زمانیگه بیریلمهگنی جدی قیینچیلیکلردن بولیب و اجتماعی ایشلر اداره بو قیینچیلیکنی حل قیلیشگه موفق بولمهگن.
اونینگ ایتیشیچه، ناگرانلر و شهیدلرنینگ عایله اعضالری حقوقلرینی قولگه کیلتیریش اوچون آیلرچه کوتهدیلر، بیراق قولگه کیلتیره آلمهیدیلر.
بدخشان ولایتیده شهیدلر عایله اعضالریدن بیرقطاری اجتماعی ایشلر ریاستی برابریده توپلنگنلر. اولرنینگ ایتیشیچه، بیر ییل- ایکی ییلدن بویان حقوقلرینی قولگه کیلتیرمهگنلر.
اولرنینگ ایتیشیچه، حقوقلرینی حکومت تامانیدن بیریلمهگنی چکهسیده، باشقه امتیازلردن هم محروم قالگنلر.
عینحالده، بدخشان اجتماعی ایشلر، شهیدلر و ناگرانلر اداره باشلیغی شفیق ایوبینینگ ایتیشیچه، مذکور ولایتده شهیدلر و ناگرانلر رقمی 10500 کیشیگه ییتیشگن و بوجملهدن 5000 تهسی حربی شهید بولیب و اجتماعی ایشلر وزیرلیگی تامانیدن منظور ایتیلگن بودجه ایترلی ایمس.
جناب ایوبینینگ ایتیشیچه، شهیدلر و ناگرانلر حقوقلرینی بیریش اوچون نیچه مرته اجتماعی ایشلر وزیرلیگیدن پول ایستهگنلر، بیراق اوشبو وزارت هر مرته درخواست ایتیلگن پولنینگ 50% نی یوبارگن. اونینگ ایتیشیچه، اوشبو اداره، شهیدلر و ناگرانلر حقوقی خصوصیدن 150 میلیون افغانی قرضدار دیر.
بدخشان اجتماعی ایشلر، شهیدلر و ناگران ریاستی مسووللرینینگ ایتیشیچه، اجتماعی ایشلر وزیرلیگی شهیدلر و ناگرانلر حقوقلری اوچون نظر گه توتیلگن بودجهنی یوبارمهگن صورتده، اولر بو توغریده جدی قیینچیلیک بیلن روپهره بولهدیلر.
