د سوېلي او منځنۍ اسیا لپاره د امریکا د بهرنیو چارو وزارت مرستیاله الیس وېلز په افغانستان کې پر زېربناوو وروستي بریدونه غندلي دي.
نوموړې پر خپلې ټویټرپاڼې لیکلي، له یوې خوا افغانان اوس د کورونا وېروس له کبله له ډېرو ننګونو او ستونزو سره لاس او ګرېوان دي، خو بلهخوا وسلهوالو د برښنا پایې په چپه کولو سره په کابل او یوشمېر نورو ولایتونو کې پر روغتونونو او کورونو برښنا درولې ده.
نوموړې لیکلي: «زه په افغانستان کې پر زېربناوو وروستي بریدونه په کلکه غندم، افغانان باید له کوېډ-۱۹ سره مبارزې ته یوموټی شي.»
نا پېژنده کسانو د یکشنبې په ورځ د کابل په میربچه کوټ ولسوالي کې د وارداتي برښنا پایه چپه او د کابل په ګډون یې په ننګرهار، لغمان، میدان وردګ، غزني، لوګر، پکتیا او خوست کې زرګونه کورنۍ له برښنا بېبرخې کړې.
برښنا شرکت نن خبر ورکړ چې د کابل د برښنا مزي چې ۱۲۰ مېګاواټه برښنا لېږدوي، د لنډ مهال لپاره تړلي او د پایې پر اساسي جوړولو کار روان دی.
د دغه شرکت په وینا، پر یاده پایه ۲۳ میلیونه افغانۍ لګښت راځي او په راتلونکو څلورو یا پنځو ورځو کې به یې په اساسي ډول جوړه او د وارداتي برښنا پرې شوي مزي به بېرته وتړي.
