د افغان سولې په خبرو اترو کې د امریکا او طالبانو د استازیو ترمنځ د نورو موضوعاتو تر څنګ، یوه لانجمنه موضوع هم اوربند و.
امریکا او افغان حکومت ټینګار کوي چې طالبان اوربند ته غاړه کېږدي، ان تر دې چې د افغان سولې لپاره د امریکا د بهرنیو چارو وزارت ځانګړي استازي تېره ورځ د ټویټر له لارې د طالبانو له مشرانو وغوښتل چې د خپلې ډلې د سولې مرکچي پلاوي ته دې د اوربند په اړه د بحث واک ورکړي.
خو د طالب ډلې ویاند ذبېحالله مجاهد له سلاموطندار سره په خبرو کې ویلي، یاده ډله به د امریکا له استازیو سره د اوربند په اړه بحث و نهکړي.
هغه وايي، جګړه پر دوی تحمیل شوې او تر هغې چې امریکایان په افغانستان کې وي، هېڅ ډول اوربند به و نهکړي.
د نوموړي په وینا، که ډله یې جګړه ودروي، امریکایان به له افغانستانه و نه وځي.
که څه هم طالبانو تېر کال د کوچني اختر په دې ورځو کې د حکومت له لوري تر اوربند وروسته، د حکومت غوښتنه ومنله، خو اوس داسې ښکاري چې له یاد اوربند نه ښه خاطره نهلري.
اړوند مطالب:
د قطر د غونډې لهپاره د افغان دولت د خبرو اترو پلاوي نوملړ اعلان شو
د قطر بله غونډه نن پیلېږي
«افغان حکومت به د سولې په مذاکراتو کې ځواکمن ځای ولري»
طالبان داسې مهال په غوڅ دریځ د اوربند مخالفت کوي چې اوس د هېواد په بېلابېلو ولایتونو کې د یادې ډلې جنګیالي له امنیتي ځواکونو سره په جګړه بوخت دي.
د اسلامي حکومت جوړول
د طالبانو ویاند له سلاموطندار سره په مرکه کې ویلي چې طالبان به په افغانستان کې اسلامي نظام جوړ او ټولې چارې به د اسلامي قانون له مخې پر مخ یوسي.
ذبېحالله مجاهد د ښځو د ازادۍ په اړه وايي، دیني عالمان د ښځو ازادي په ګوته کوي او دا به په هغې کچه کې وي چې په اسلام کې دي. د نوموړي په وینا، د غربي کلتور پر بنسټ د ښځو ازادي دې ډلې ته د منلو نهده.
مجاهد زیاتوي، د اسلامي حکومت د جوړېدو په اړه د طالبانو دریځ به د قطر په راتلونکې غونډه کې روښانه شي او که پهدې برخه کې کوم مخالفت رامنځته شي، دا ډله به یې په اړه پر راتلونکیو اقداماتو غور وکړي.
ټاکل شوې د افغان حکومت او وسلهوالو طالبانو استازي د روانې میلادي میاشتې په ۱۹مه په قطر کې غونډه وکړي چې دواړه لوري به پهکې د هېواد پر راتلونکي بحث او خبرې اترې وکړي.
د ملي یووالي حکومت هم د هغو کسانو نوملړ خپور کړی چې ټاکل شوې د قطر په غونډه کې ګډون وکړي.
