د امریکايي رسنیو د راپورونو له مخې، پنټاګون د روان میلادي کال په پیل کې له امریکايي چارواکیو سره د خبرو لپاره دوحې ته د طالبانو د استازیو د سفر او نورو لګښتونو لپاره له کانګرسه د پیسو غوښتنه کړې وه.
د کانګرس د استازیو جرګې د دفاعي بودیجې د فرعي کمېټې ویاند کیون سپایسر ویلي، پنټاګون د ۲۰۲۰ میلادي کال په بودیجه کې د پخلاینې د فعالیتونو په نوم بودیجه غوښتې وه.
راپور زیاتوي چې پنټاګون دا پیسې د طالبانو د استازیو د سفر، هستوګنې، خوړو او وسایلو لپاره غوښتې وې، خو د دفاعي بودیجې د فرعي کمېټې ویاند ویلي، د دفاع وزارت دا طرحه له هغه قانون سره په ټکر کې ده چې د ترهګریزو ډلو مادي ملاتړ ته اجازه نه ورکوي.
د هغه په وینا، طالبان پر امریکايانو بریدونو ته دوام ورکوي، افغان حکومت نه مني او لا هم په ټولنه کې د ښځو د حقونو له منلو انکار کوي.
دا په داسې حال کې ده چې د امریکا او طالبانو د استازیو ترمنځ پر افغان سولې د خبرو اترو شپږم پړاو خبرې اترې هم شوي، خو لا هم وسلهوال طالبان له افغان حکومت سره بینالافغاني خبرو اترو او اوربند ته حاضر نهدي.
