جمهور رییس باراک اوباما پنجشنبه، 15 اکتبر آق اویده قیلگن چیقیشیده 2016 ییل دوامیده امریکانینگ افغانستاندهگی حربی کوچلرینی امریکا گه قهیتریش جریانینی سیکینلشتیریشی؛ شونینگدیک 2016 ییلدن سونگ هم افغانستانده 5500 کیشی امریکا حربیلرینی قالدیریشی بارهسیده قرار قبول قیلگنینی اعلان ایتدی.
اوباما اوز سوزلریده ترورچیلرگه افغانستان حدودیدن امریکا گه هجوم اویوشتیریش لیککه رخصت بیرمسلیگینی تکرارلهدی. بوندن آلدین امریکا رهبری تامانیدن اعلان ایتیلگن ریجه اساسیده 2016 ییل آخریگه قدر امریکانینگ حربی کوچلری بوتونلی افغانستاننی ترک ایتیشی، فقط بیر مینگ کیشی امریکالیک حربیلرنی بو مملکت نینگ کابلدهگی ایلچیلیگی امنیتینی اسرهش اوچون افغانستانده قالیشی کوتیلردی.
باراک اوبامانینگ امریکا حربیلرینی افغانستاندن آلیب چیقیش ریجهسینی قیته کوریب چیقیشیگه بیرنیچه عامل سبب ایکنی ایتیلهدی. جاری ییلده افغانستان بویلب جنگری طالبلر هجوملری آشگنی همده داعش گروهی نینگ افغانستان نینگ ایریم حدودلریده فعال لشگنی، اینیقسه 28 سینتبر کونی قندوز شهرینی یشین تیزلیگیده طالبلر اشغالیگه اوتیشی بیرینچی عامل سنهلهدی.
ایکینچی مهم عامل ایسه امریکا حربیلری نینگ افغانستاندهگی قوماندانی جان کیمپبل همده مملکتده خذمت قیلگن امریکالیک حربی قوماندانلر قاله ویرسه پنتاگون نینگ امریکا حربیلری نینگ افغانستاندهگی خذمتی چوزیلیشی بارهسیدهگی فکر و نظری باشقه بیر مهم عامل حسابلنهدی.
امریکالیک بلند مرتبهلی حربی منصبدارلر امریکا حربی لرینی تیزلیک بیلن افغانستاندن آلیب چیقیلیشی بو مملکتده اوتگن اون تورت ییل دوامیده کته مبلغلر صرفلش حسابیگه قولگه کیریتیلگن یوتوقلرنی پوچگه چیقهریشی بارهسیده بار بار آگاهلنتیریب کیلگن ایدیلر.
عین حالده امریکا سناسیده هم امریکا حربیلرینی افغانستاندن تیز آرهده آلیب چیقیلیشیگه قرشی بولگن سناتورلر سانی آز ایمس. باراک اوباما اوز سوزلریده هر قچان افغانستانده قوشیمچه حربی کوچلرگه شونینگدیک امریکا حربیلری نینگ بو مملکتده قالیشی جدولیگه اوزگریش کیریتیش لیککه احتیاج سیزیلگنده، لازم اوزگریشلر کیریتیلیشینی تیلگه آلگن ایدی.
اوباما کیلهجکده هم امریکانینگ افغانستاندهگی حربی کوچلری ماموریتی اوزگرمسلیگینی تاکیدلهدی. اونگه کوره امریکا حربیلری افغانستانده بیواسطه اوروشلرده قتنشمه یدی و مملکت شهرلری کوچهلریده گیزمهیدی. امریکا حربیلری نینگ آلدین اعلان ایتیلگن افغانستاندهگی ماموریتی اساسیده اوشبو کوچلر افغان حربیلرینی تیارگرلیکدن اوتکزیش، اولرگه مصلحت بیریش همده لازم پیتلرده اولرنی حمایت ایتیش بیلن شغللنهدی.
اوباما، امریکا حربیلری نینگ افغانستان ماموریتی جدولی بیرینچی مرته اوزگرتیریلمه گنینی تاکیدلب، مذکور اوزگریش سونگیسی ایمسلیگینی هم تیلگه آلگن ایدی. امریکا رهبری سوزلریدن معلوم بولیشیچه رسمی واشنگتن افغانستان مسالهسی گه بو مملکتده حکم سورهدیگن واقعیتلر اساسیده مسوولانه یانده شهدی.
اوباما نینگ افغانستاننی تروچیلیککه قرشی کوره شده، امریکانینگ مهم بیر ستراتیژیک شریکی ایکنینی اوقتیریب، امریکانی افغانستانده امنیتنی تامینلشده اوز مسوولیتلرینی بجرهدی دیگن معناده سوزلهگن نطقی اوزیگه خاص اهمیتگه ایگه. عین حالده او، افغانستانده ترورچیلیککه قرشی فعالیت آلیب بارهدیگن ائتلاف کوچلری همده ناتوگه اعضا دولتلردن هم اوز حربی کوچلرینی تیزلیک بیلن افغانستاندن آلیب چیقمسلیکلرینی سورهدی.
باراک اوباما سوزلریدن سونگ ایتالیا دولتی اوز حربی کوچلرینی ینه بیر ییل اوچون افغانستانده قالدیریشینی اعلان ایتدی. شونینگدیک آلمان دولتی هم اوز کوچلرینی نامعلوم مدتگه قدر افغانستانده خذمت قیلیشی بارهسیده خبر بیردی.
یقین کونلرده اروپا دولتلری و ترورچیلیککه قرشی کوره شده امریکا نینگ باشقه غربلیک شریکلرینی هم اوز حربیلری افغانستانده قالدیریشلری توغریسیده اوز قرارلرینی اعلان ایتیشلری کوتیلهدی.
اوباما بیاناتی نینگ پیغاملری، امریکا جمهور رییسی نینگ 15 – اکتبرده قیلگن چیقیشی افغانستان خلقی اوچون اوته مهم بیر بیانات سنهلهدی. طالبلرنینگ شمال ولایتلریگه اویوشتیرگن سونگی هجوملری اینیقسه قیسقه مدت اوچون قندوز شهرینی جنگریلر اشغالیگه اوتیشی افغانستان اهالیسینی مایوس قیلگن ایدی.
باراک اوباما اوز صحبتیده امریکا دولتینی افغانلر یورتیده تینچلیکنی تامینلهش اوچون اوز وعدهلریگه وفادار قالیشینی تکرارلهدی و افغانستاننی قیته طالبلر کبی ترورچی گروهلر اشغالیگه اوتمسلیگی بارهسیده ایشانچ بیلدیردی. عین حالده اوباما نینگ صحبتیده دولتگه قرشی جنگ قیلهدیگن قوراللی گروهلر جملهدن طالبلراوچون آچیق بیر پیغام ینگرهدی.
اوباما طالبلرنی اوروشدن واز کیچیب سیاسی یوللر آرقلی اوز مشکللرینی برطرف ایتیشدن بولک چارهلری یوقلیگینی معلوم قیلدی. در حقیقت اوباما گپلری، نه فقط طالبلر و باشقه عصیانچی گروهلر بلکه اولرنینگ منطقه دهگی حامیلری اوچون هم آچیق پیغام ایدی. امریکا رهبری نینگ سونگی چیقیشی طالبلر و اولرنینگ منطقه سطحیده قوللب قوتلهیدیگن دولتلرنی اویلنتیریب قویگن بولیشی طبیعی بیر حال.
چون که اولر، امریکا حربیلری 2016 ییلی افغانستاننی ترک ایتیشی بیلن مملکتنی کوچ ایشلتیش آرقهلی اشغال ایتیشلرینی تصور ایتردیلر. اوباما نینگ سونگی چیقیشی اولرنینگ اوشبو خیالاتینی باشلریدن اوچیرگن بولیشی ممکن. یقین کیلهجکده طالبان و اولرنینگ حامیلرینی افغانستان دولتی بیلن تینچلیک مذاکرهلرینی اوتکزیش بارهسیده تمایل بیلدیریشلری کوتیلهدی.
رسمی کابلنی بو مرته اولر بیلن بلند موقع و موضعدن توریب بحثلهشیشی لازم. عکس حالده طالبلرنی ینه بیر بار فرصتلرنی اولدیریب، ینه ینگی سیاسی شرایط یرهتیلیشی اوچون اورینشلرینی توشینسه بولهدی. 2016 ییل آخریگه قدر امریکا نینگ اون مینگگه یقین حربیلری افغانستانده قالهدی. 2017 ییلده هم مذکور کوچلرنینگ یرمیدن کوپراغی یعنی 5500 نفری مملکتدهگی بیر نیچه قرارگاهده سقلنهدی.
اوندن علاوه ناتوگه اعضا دولتلر کوچلری نینگ نا معلوم ساندهگی حربیلرینی مملکتده قالیب، افغانستان امنیتینی تامینلهش همده ترورچیلیککه قرشی کوره شده قتنهشیشلری کوتیلهدی. افغانستانده قالگن مذکور کوچلرنینگ سانی قنچه لیگیدن قطع نظر اولرنینگ افغانستان ایچکریسیدن توریب وضعیتنی کوزهتیب باریشی اوزیگه خاص اهمیتگه ایگه.
در واقع مذکور کوچلرنینگ افغانستانده قالیشی افغانلر تقدیری دنیا جماعهچیلیگی دقتیده ایکنیدن درک بیرهدی. قاله ویرسه افغانستان اهالیسی اینیقسه امنیتی کوچلر روحیاتی و مورالینی آشیریشگه کمک قیلهدی.
