روسیه جمهور رییسی، افغانستان جمهور رییسی تامانیدن بولگن حربی یاردملر ایستهگیگه جواب ایتیشیچه، ایکی مملکت رسمیلری بو توغریده بحث اوتکزیشلری کیره ک.
جمهور رییس غنی، اوتکن کون کیچ قورون 20- سرطان، روسیهنینگ اوفا شهریده ولادیمیر پوتین بیلن اوچره شیب، اوشبو مملکتدن افغانستان مدافع و امنیتی ، اینیقسه هوایی کوچلریگه تسلیحاتی یاردم بیریشینی سورهدی.
شونینگدیک جمهور رییس غنی، جناب پوتیندن تروریسم و بنگی وارمادهگه قرشی کورهشیش توغریسیده افغانستانگه یاردم بیریشینی ایستهدی.
روسیه جمهور رییسی، بو اوچرهشووده مملکتینینگ افغانستان بیلن بولگن علاقهسینی صمیمی بیلیب ایتیشیچه، ایکی مملکت تروریسم و بنگیوارماده تهدیدلری توغریسیده بیردیک اویلهیدی.
جمهورلیک سرایی تامانیدن ترقهتیلگن خبرنامهده کیلیشیچه، جناب غنی، روسیه جمهور رییسی پوتین بیلن اورچرهشگن چاغیده، روسیه، هند و چین مملکتلری، تروریسم و بنگیوارمادهگه قرشی کورهشیش توغریسیده بیری- بیراویگه یاردم بیریشلرینی سورهدی.
افغانستان شمالیدهگی ناتینچلیکلر، جناب غنی و روسیلیک همکسبینینگ اورتهسیده بحثگه آلینگن مسئلهلردن بیری ایدی. مملکت جمهور رییسینینگ بو توغریده ایتیشیچه، تروریستی گروهلر افغانستانده نفوذ قیلیب، منطقه مملکتلرینینگ خطرگه دوچ کیلتیریشنی ایستهیدی. اونینگ کوپهیتیریشیچه، بو وضعیتنی اوزگرتیریش اوچون، اقتصاد و امنیت توغریسیده اساسی شکلده ایشلش لازم.
بو خبرنامهگه کوره، بو اوچرهشووده جناب غنینینگ ایتیشیچه، ایکی مملکت اورتهسیدهگی سوداگرلیک علاقه یخشی بولگن و بو علاقه بیردیک بولیشی لازم. شونینگدیک اونینگ کوپهیتیریشیچه، افغانستاننی 10 فایز سوداگرلیگی روسیه و اورتهآسیا مملکتلریگه باغلیق.
شونینگدیک مملکت جمهور رییسی، افغانستان و روسیه اورتهسیده سوداگرلیک علاقهسی کینگیتیریلیشی توغریسیده اوزاق مدتلی و اورته مدتلی کیلیشووگه قول قوییلیشینی سورهدی.
بو اوچرهشووده، روسیهنینگ افغانستان یاشلریگه حربی و ملکی تعلیمات یاردملری توغریسیده بحث اوتکزیلگن. روسیه جمهور رییسینینگ سوزبیریشیچه، روسیه بیلیم یورتیلریده افغانستان یاشلری اوچون بولگن تحصیلی بورسیهلر سانی کوپهیتیریلیشی ممکن.
ایتیلیشیچه، حاضر مملکت اوقووچیلریدن 200 تهسی حربی بولیم لر و باشقه 400 تهسی ملکی بولیملرگه روسیهده تعلیم کورهدی.
شونینگدیک جمهور رییس، افغانستاننی شانگهای همکارلیک تشکیلاتیگه اصلی عضو بولیشی و بو توغریده روسیهنینگ حمایت ایتیشینی سورهدی.
خبرنامهده کیلیشیچه، جناب پوتین، ایکی مملکت اورتهسیده سرمایه یاتقزیشلرنی کوچلنتیریش اوچون ایکی حکومت ارا کمیته ایجاد ایتیشینی تیلگه آلگن.
جمهور رییس غنی، اوتکن هفته پنجشنبه کون ایرتهلب، حکومت بلند مرتبهلی بیر هیأت بیلن شانگهای تشکیلاتی عضوی بولگن مملکتلر باشلیغلرینینگ 15- اولتیریشیده اشتراک ایتیش مقصدیده روسیهگه ییتیب باردی.
بو سفرده جمهور رییس بیلن تشقی ایشلر وزیری صلاحالدین ربانی، ملی امنیت مصلحتچیسی حنیف اتمر و اورته آسیادهگی جمهور رییس خاص نمایندهسی شاکر کارگرلر همراه ایدی.
شانگهای تشکیلاتی منطقهده مدنیت، اقتصاد و نیچه تامانلمه امنیتی همکارلیکلر اوچون میلادی 2001- ییلده ایجاد ایتیلدی. چین، روسیه، قزاقستان، تاجکستان، اوزبیکستان و قرغیزستان مملکتلری اصلی اعضالری بولیب، شونینگدیک افغانستان، ایران، هند، پاکستان و مغولستان مملکتلری ایسه بو تشکیلات ناظر اعضالری دییلهدی.
