قندوز بدرغهلریگه کوره، یمان حالتده قرار تاپگنلر و حاضرگچه اولرگه هیچ قنقه یاردم بیریلمهگن. اوشبو بدرغهلر سانی اونلرچه بولیب، قندوز طالبلر نظارتیگه اوتکنیدن کیین، مذکور ولایتنی ترک ایتیب پایتخت کیلگنلر. اولر شنبه کون، بیر نمایش آرقهلی حکومتدن یاردم سورهگنلر.
شوندهی حالده، افغانستان یاشلر ملی جمغرمهسی (شنبه کون) بیر خبری ییغینده ادعا قیلیشیچه، قندوز حالتی حکومت رسمیلرینینگ ایتگنیدن کوره یمان دیر. اوشبو قوریلمه رسمیلری، مذکور ولایت بدرغهلریگه یاردم بیریلیشینی سورهگن. شونینگدیک، اولر بیر شرطنامه چیقاریب حکومتدن قندوزنی بوتونلهی قوراللی طالبلردن تازهلشینی ایستهگن.
اولر، امنیتی رسمیلرنینگ قندوز شهری طالبلردن تازهلنگنی توغریسیده ایتکن سوزلرینی رد ایتیب ایتیشیچه، حاضر قندوزده اویمه اوی اوروش دوام ایتماقده. مملکت یاشلر ملی جمغرمه مسؤوللریگه کوره، شهرنی ترک ایتمهگن یشاوچیلر جدی قیینچیلیک جملهدن ایچیم سوو و ییمک ماده کملیگیگه روپهره بولگنلر.
افغانستان بوییچه خلق ارا تشکیلاتی پول صندوقی باشلیغی ویس برمکنینگ اوشبو ییغینده ایتیشیچه، حکومت و خلق ارا ادارهلری قندوز بدرغهلریگه تیزلیکده یاردم بیریشی کیرهک. جناب برمک، مذکور یشاوچیلرگه اوشبو یاردملر بیردیک ییتیشتیریلیشینی سورهدی.
شونینگدیک، شمال شرق ولایتلری مدنی فعاللر گروهی، اوشبو خبری ییغینده، بغلان، تخار و بدخشان ولایتلری ناتینچلیگی توغریسیده خواطر بیلدیریب ایتیشیچه، وضعیت شوندهی بیرحالده دوام ایتکن صورتده، مذکور ولایتلرهم سقوط گه روپهره بولهدی. اوشبو اداره معلوماتیگه کوره، قندوز ولایتی طالبلر نظارتیگه اوتکنیدن کیین، مذکور ولایتدن یالغیز 4220 عایله تخار ولایتی، 250 عایله بدخشان ولایتی، 100 عایله سمنگان ولایتی و باشقه یوزلرچه عایله کابلگه بدرغه بولگنلر.
مدنی فعاللر شرط نامهسیده، قندوز ولایتی بوتونلهی طالبلردن تازهلنیشی، امنیتی کوچلر جهازلنیشی، قندوز سقوطی عامللری تانیلیشی، مذکور ولایتده انسان حقوقی جنایتلری تیکشیریلیشی، بوزیلگن منطقهلر قیته قوریلیشی و مملکت شمالیده بیرقطار ولایتلر سرپرستلیگی یکونلنیشی، اولرنینگ اساسی ایستکلریدن بولگن.
گزارشلرگه کوره، قندوز شهری طالبلر نظارتیگه اوتکنیدن کیین، کمیده 6 مینگ عایله قوشنی ولایتلرگه بدرغه بولگن، شونینگدیک مذکور شهرده دولتی و غیر دولتی دفترلر بنالری شامل اونلرچه اولتیریش اوی طالبلر تامانیدن اوتکه یاندیریلگن.
قندوزده 300 دن آرتیق طالب هلاک بولگن
خلق منبعلریگه کوره، قندوز شهرینی بیر قسمی طالبان نظارتیگه و باشقه بیر قسمی دولتی کوچلر نظارتیگه بولگن. اوشبو منبعلرنینگ ایتیشیچه، ایریم پیت اوروشچین اوچاقلر شهرنی بمبارد قیلهدی و طالبان گروهی بیلن دولتی کوچلر اورتهسیده توقنهشوولر یوزبیرهدی.
ایچکی ایشلر وزیرلیگی سوزلاوچیسی صدیق صدیقینینگ (شنبه کون) بیر خبری ییغینده ایتیشیچه، مذکور ولایتده امنیتی کوچلر عملیاتی نتیجهسیده حاضرگچه 300 دن آرتیق طالب هلاک بولگن. اونینگ اورغولشیچه، یشاوچیلرنینگ مال و جانی دولتی کوچلر تامانیدن سقلنهدی. شونینگدیک جناب صدیقینینگ کوپهیتیریشیچه، یوزدن آرتیق طالب توتقونگه آلینگن. اونگه کوره، امنیتی کوچلردن ایکی الی اوچ کیشی هلاک بولگن.
قندوز امنیه قومندانی قسیم جنگل باغنینگ ایتیشیچه، حاضر امنیتی کوچلر آلغه بارماقده. جناب جنگل باغگه کوره، طالبلر تینچ اهالی اویلریده جایلهشیب و تینچ اهالیلردن سپر شکلده ایش آلهدی.
طالبلر آلتی کون آلدین (دوشنبه کون، 6- میزان) نیچه تاماندن قندوز اوستیگه هجوم اویوشتیرگن ایدی و شونینگدیک، اوشبو گروه هجومی باشقه ولایتلر جملهدن تخار، بغلان و بدخشانده شدت لندی.
