داسې ويل کيږي، چې امريکا پر پاکستان له دې امله خپل یو ميليارډ ډالري مرسته بنده کړې، چې دغه هېواد په خپله خاوره کې د ترهګرو پر وړاندې جدي او صادقانه مبارزه نه کوي.
د تروریزم سره د مبارزې په برخه کې امريکا پاکستان ته د کال یو میلیارډ ډالره مرسته کوله.
امريکايان ويلي، چې پاکستان په خپله خاوره کې د حقاني شبکه تر بريد لاندې نه نیسي.
د حقاني شبکه د امريکې له نظره یو تر ټولو خطرناکه ترهګریزه شبکه بلل کيږي.
ځينې پاکستاني رسنۍ وايي، چې واشنګټن له اسلام اباد څخه په شمالي وزیرستان کې د پوځي عملياتو د ترسره کولو څخه رضایت نه لري.
سپنې ماڼۍ ویلي، چې د حقاني شبکه په شمالي وزیرستان کې ده او تراوسه د پاکستاني ځواکونو له لوري په نښه شوي نه دي.
په شمالي وزیرستان کې میشت د حقاني شبکه د ترهګرو یو له اصلي ځالو بلل کيږي، چې په افغانستان زیات ترهګریز فعاليتونه د همدغې شبکې له لوري پلانيږي.
د حقاني شبکه په افغانستان د عامو خلکو، افغان ځواکونو، نړېوالو او په ځانګړي توګه د امريکايي ځواکونو د وژلو زیات مسوولیتونه منلي.
د پاکستان ډان ورځپاڼه لیکي، چې د امريکا دفاع او بهرنيو چارو وزارتونه پاکستاني مقاماتو ته ویلي، چې له ۲۰۱۵ م ز کال څخه وروسته به نور امريکا له پاکستان سره هر کال یو میليارډ ډالر مرسته نه کوي.
د امريکا ګانګرېس هم د ترهګرو سره د مبارزې په برخه د پاکستان له کړنو رضایت نه لري او ویلي يې دي، چې پاکستان باید د حقاني شبکې پر وړاندې جدي مبارزه کړي وای.
