د افغانستان د هلمند ولایت اوسېدونکي د اطلاعاتو او کلتور نوي وزیر عبدالباري جهاني په ملاتړ د لاريون په ترڅ کې وویل، چې دوی د باري جهاني ملاتړي دي او د نوموړي پر ضد يې پر لاریون کوونکو د ایران د کلتور د پلويتوب تور ولګاوه.
لاريون کوونکو له مرکزي دولت وغوښتل، چې د کلتوري يرغل مخه دې ونيسي، په هېواد کې دې هغه رسنۍ د عدالت مېز ته کښينوي، چې د ګاونډيو په مالي ملاتړ ژبني، او کلتوري مخالفتونه زېږوي.
د هلمند مدني ټولنې مشر وويل، د ولسي خوځښت په مرسته به د پرديو کلتوري يرغلګرو مخه ونيسي.
لاريون، چې د هلمند مدني ټولنې له لوري د هلمندي ولس په ملاتړ جوړ شوی و د دغه ولايت لسګونو وګړيو ګډون په کې کړی و.
د هلمند خلک چې په خورا جوش راوتلي و، د هلمند مدني ټولنې له انګړه د ولايت مقام تر دروازې پورې لاړل، او د مرګ پر ايران، او مرګ پر کلتوري يرغل کوونکو، شعارونه يې ورکول.
د دوی په لاسونو کې هغه پېغام پاڼې هم وې، چې د اطلاعات او کلتور د وزير عبدالباري جهاني څخه په کې کلک ملاتړ اعلان شوی و.
لاريون کوونکو هغه خلک د ايران پلوه کړيو غړي وبلل، چې د افغانستان د اطلاعات او کلتور د وزير پر ضد يې دوې ورځې وړاندې مرکز کابل کې شعارونه ورکړي وو.
دوی له مرکزي حکومت ټينګه غوښتنه وکړه، هغه لاسونه دې لنډ کړي، چې د ګاونډيو پر اشارو په هېواد کې کلتوري يرغل او ژبنيو مخالفتونو ته زمينه برابروي.
لاريون کوونکو د ايران د ولسمشر حسن روحاني انځورونه وسېځل او پر ايران یې تور پورې کړ، چې په افغانستان کې کلتوري يرغل او ژبني تعصب خپرولو ته لمن وهي.
وروسته د هلمند مدني ټولنې د مشر سردار محمد همدرد له خوا پنځه ماده ييز پرېکړه ليک هم رسنيو ته واورل شو، چې په کې د اطلاعات او کلتور وزير عبدالباري جهاني څخه د هلمند د ولسونو کلک ملاتړ اعلان شوی و او له دغه وزارت نه په کې ټينګه غوښتنه شوې وه، هغه رسنۍ دې د عدالت مېز ته کش کړي، چې د ګاونډيو په مالي مرسته او اشارو په ملي مقدساتو او ارزښتونو رسنيز يرغل کوي.
دوې ورځې وړاندې د اطلاعات او کلتور د وزير عبدالباري جهاني پر وړاندې وروسته له هغه غبرګونه راوپارېدل، چې د رسنيز سمون په موخه يې ځينې رسنۍ پوښتې وې، چې د کومو مالي سرچينو په مرسته فعاليتونه ترسره کوي.
د اطلاعات او کلتور وزير د خپلې دندې په لومړۍ ورځ ژمنه کړې وه، هغه رسنۍ به ورغواړي او پوښتنې ګروېږنې به ترې کوي، چې د بهرنيو په مالي مرسته او اشاره افغانستان کې رسنيز فعاليتونه کوي.
