د افغانستان او پاکستان لپاره د المان سفیر او ځانګړی استازی مارکوز پوتسل نن په کابل کې یوې مشورتي غونډې ته چې په سوله کې د ښځو رول په اړه جوړه شوې وه، وویل چې المان به د افغان سولې لپاره د امریکا د بهرنیو چارو وزارت د ځانګړي استازي زلمي خلیلزاد په بلنه په یاده پروسه کې همکاري وکړي.
د المان ځانګړی استازی زیاتوي، د امریکا او طالب استازیو ترمنځ په اووم پړاو خبرو کې د امریکايي ځواکونو پر وتلو، له ترهګرۍ سره پر مبارزې، اوربند او د بینالافغاني خبرو پر پیلولو خبرې کېږي.
پوتسل د سولې په روانو خبرو کې د افغانستان د تېرو اتلس کلنو لاستهراوړنو پر خوندي ساتلو ټینګار وکړ.
د بهرنیو چارو وزارت سیاسي مرستیال ادریس زمان هم په قطر کې د امریکا او طالب استازیو ترمنځ د سولې خبرو شپږم پړاو ناکام وباله او زیاته یې کړه چې د محتوا له اړخه د یاد پړاو خبرې له ځینو ستونزو سره مخ وې.
- قطر؛ د سولې خبرو اترو کې لا چټک پرمختګ ته اړتیا ده
- په قطر کې څه روان دي؟
- نن په قطر کې د امریکايي او طالباستازیو ترمنځ ۶م پړاو خبرې پیلېږي
زمان د سولې په خبرو اترو کې د المان هېواد د پراخه رول لوبولو غوښتنه وکړه.
بلهخوا د ولسمشري ټاکنو نوماند فرامرز تمنا د طالب بندیانو خوشې کول او د جګړې دوام، د افغانستان د امنیتي مسایلو په مدیریت کې تناقض بولي.
تمنا وايي، که طالبان خوشې کېږي، د جګړو په جبهاتو کې باید اوربند اعلان شي، څو د یو څو محدودو کسانو د ګټو لپاره د جګړې په لیکو کې افغانان ونه وژل شي.
دا په داسې حال کې ده چې پهدې وروستیو څو ورځو کې د طالب بندیانو خوشې کول له جدي نیوکو سره مخ شوي دي.
