د حزب اسلامي مشر ګلبدین حکمتیار نن کابل کې یوې خبري غونډې ته وویل، د ملي یووالي حکومت ځېنې چارواکي له دولتي واک او امکاناتو په ګټنې هڅه کوي داسې ټاکنې وشي چې په پایله کې یې د دوی د خوښې نوماندان بریالي شي.
ښاغلي حکمتیار وویل، د دغسې ټاکنو پایلې به تر اوسني پارلمان، نابریالي او بحران زېږونکي پارلمان جوړېدو ته لاره هواره کړي.
هغه زیاته کړه، د ټاکنو خپلواک کمېسیون د حکومت د دواړو ډلو په خوښه جوړ شوی چې په همدې دلیل، هغو سیمو کې په تذکرو سټېکرې لګول شوېدي چې د دوی د خوښې او اعتبار وړ دي.
د حزب اسلامي مشر په وینا، له دغو مواردو داسې ښکاري چې دولت ټاکنو کې د تقلب اراده لري.
د حزب اسلامي مشر همدارنګه وویل، له درغلیو ډکې ټاکنې هېڅ لوری نه مني او دولت باید د ګوندونو طرحه ـ چې د رڼو ټاکنو ترسره کولو لهپاره جوړه شوې ـ ومني او د ټاکنو کمېسیون یې عملي کړي.
د حزب اسلامي مشر حکمتیار دا هم وویل، چې حکومت وايي، د ولسوالیو شوراګانو د غړیو لهپاره د معاش ورکولو امکانات کم دي؛ چې په وینا یې دا د لویې جرګې د جوړېدو لهپاره یوه بهانه ده. د ښاغلي حکمتیار په خبره، د یو شمېر افغان چارواکیو د یوې میاشتې لګښت، د ولسوالیو شوراګانو د وکیلانو یو کال له معاش سره برابره ده.
ومو غوښتل د ګلبدین حکمتیار دغو څرګندونو په تړاو د ولسمشرۍ ماڼۍ او ټاکنو کمېسیون نظر هم واخلو؛ خو له پرلهپسې هڅو وروسته بیا هم بریالي نهشو.
