د الباما په جنوب ختیځ سیمه کې د یکشنبې په ورځ ماسپښین دوه بجې د سخت توپان او باران له امله د ۲۲ تنو ژوند اخېستی او څو نور ټپیان شوېدي. دې سخت توپان شاوخوا سیمې هم زیانمنې کړېدي.
د اوسوسیټېډ پرې خبري اژانس لیکلی، د امریکا جنوبي ایالت د الباما د «لي» ولسوالۍ د اضطراري حالاتو ادارې مشر جرج جونز کلینتون وايي چې نن سهار په سیمه کې د مړیو او ټپيانو د پلټنې په پار هوايي او ځمکني عملیات پيل شوېدي او په خبره یې، ممکن په تلفاتو کې زیاتوالی راشي.
د دې ادارې په وینا، دې توپان شاوخوا نیم مایل سیمه تخریب کړې چې ځېنې کورنه هم ورکې زیانمن شويدي.
دوی له دولته د مرستې غوښتنه کوي چې سیمه کې ژر تر ژره د پلټنې کارونه پیل کړي.
د الباما د هواپېژندنې ملي ادارې د یکشنبې په ورځ د حداقل F3 رتبې په اندازه د توپان وړاندوینه کړې وه چې د نیم مایل مسیر په اندازه ویجاړی کولی شي. د دې ادارې په خبره، دا توپان د جورجیا، جنوبي کارولینا او فلوریدا له لوري رالوتی و.
د پېښې له سیمې خپرې شوې ویډيوګانې ښيي چې په سیمه کې کورنه ویجاړ شوي، ونې چپه شوي او موټرې ځای پر ځای ولاړې دي.
د امریکا ولسمشر ډونالډ ټرمپ د یو ټویټ په کولو سره د پېښې له قربانیانو سره خواخوږي ښودلې ده.
