په افغانستان کې د اروپايي ټولنې سفیر پېر مایدون چې نن یې په کابل کې د اقلیمي ګواښونو څېړلو غونډه کې خبرې کولې وویل، اقلیمي بدلونونه به د اقتصادي، سیاسي او منیتي مسایلو ترڅنګ، پر افغانانو فشار راوړي او د اوبو پرسر به له اېران او پاکستان سره د افغانستان رقابتونه ډېر کړي.
نوموړی وايي، اروپايي ټولنه به د اقلیمي بدلونونو او وچکالۍ پروړاندې مبارزې کې د افغانستان له حکومت او خلکو سره همکاري وکړي.
ښاغلی مایدون زیاتوي، افغانستان به د پاریس معاهدې ترڅنګ د دې ګواښونو پروړاندې مبارزې لهپاره هم هڅې وکړي او اروپايي ټولنه به له افغان حکومت سره په ګډه د هغو خلکو لهپاره ځانګړې طرحې او پروګرامونه جوړ کړي چې د وچکالۍ له ګواښ سره لاس او ګرېوان دي.
دا په داسې حال کې ده چې ولسي جرګې څو ورځې وړاندې هېواد کې د وچکالۍ زیاتوالي او له کبله یې د خلکو بېځایه کېدو په اړه د کرنې، اوبولګولو او مالدارۍ، کلیوبیارغونې او پراختیا وزارتونو او چاپېریال ساتنې ملي ادارې مسوولان استجواب کړي وو او هغوی هم د دې ګواښ پروړاندې مبارزې برخې کې د مشخصو تګلارو خبر ورکړی و.
