د امریکې په متحده ایالاتو کې میشت یوه افغان مشهوره سوداګر عبدالبصیریاسیني اعلان وکړ، چې د انګلستان خلاف په نړیواله شل اوریزه لوبه کې به افغان لوبغاړي په زرګونه ډالرو ونازوي.
عبدالنصیر یاسیني سلام وطندار راډیو سره په خبرو کې وویل، چې په ۶ م پړاو۲۰اوریزه کرکټ نړیوال جام کې به د انګلستان خلاف سیالۍ کې تر ټولو ستره جایزه د ۱۰ زرو ډالرو ډالۍ کړي.
د نوموړي په وینا که دانګلستان خلاف د روانې مارچ میاشتې په ۲۳ مه نیټه په ډهلي کرکټ نړیوال لوبغالي کې کوم افغان لوبغاړی په (سلیزه) جوړولو بریالی شي، نو جیب به یې له ډالرو ډک کړي.
د یادونې وړ ده، چې دواړو افغانستان او انګلستان خپلې لومړۍ لوبې سریلانکا او ویسټ انډیز کرکټ ملي لوبډلو ته بایللې دي.
یاسیني یو نړیوال سوداګر او د (سهارا وایرلیس) په نوم د مبایلو د یوه شرکت مشر دی او اوسمهال په امریکا کې ژوند کوي.
د دغه سوداګر په وینا، په سلیزه جوړولو د ۱۰ زرو ډالرو انعام ترڅنګ به په نیمه سلیزه د ۳ زرو ډالرو او دغه راز د افغانستان له لورې په لوبه کې د غوره لوبغاړي جایزې اخیستونکي ته د ۵ زرو نغدو ډالرو جایزه ورکړي.
د سهارا وایرلیس شرکت مشر زیاته کړه، چې دا کار د هندوستان په کوربتوب په روان ۲۰۱۶ م کال ۶ م پړاو شل اوریزه کرکټ نړیوال جام سیالیوکې د افغان کرکټ ملي لوبډلې د تشویق په موخه کوي.
یاسیني وویل، چې افغان کرکټ ملي لوبډله د کرکټ بې ساری استعداد لري او په روان کرکټ نړیوال جام کې هرې لوبډلې ته د ماتې ورکولو وړتیا لري.
دا په داسې حال کې ده، چې افغان کرکټ ملي لوبډلې د ۲۰ اوریزه کرکټ نړیوال جام (سوپرټین) پړاو لومړۍ لوبه کې بیګا شپه د ۶ ویکټو په توپیر له اتلولۍ دفاع کوونکې سریلانکایۍ لوبډلې نه ماتې وخوړه.
