.jpg)
افغان کرکټ ملي لوبډله نن له غرمې مخکې د یو بل مهم هدف لهپاره له عربي اماراتو نه د زمبابوی د پلازمینې «هرارې» په لوري روانه شوه.
د ورکړل شویو معلوماتو لهمخې، افغان کرکټ ملي لوبډله به په زمبابوی کې د انګلستان په کوربتوب ۲۰۱۹ کال ۵۰ اوریز کرکټ نړیوال جام سیالیو ته په غوراوي پړاو کې په (ب) ګروپ کې سیالۍ وکړي.
دغه لوبې د مارچ پر ۴مه د ۱۰ لوبډلو ترمنځ پیلېږي چې افغان لوبډله به پهکې د وېسټانډيز او هالینډ پر وړاندې له تمریني لوبو وروسته په رسمي سیالیو کې له سکاټلینډ، زمبابوی، هانګکانګ او نیپال کرکټ ملي لوبډلو سره سیالۍ وکړي.
د دې غوراوي پړاو پرمهال ګروپي سیالۍ په ټلوېزیون نهښودل کېږي؛ خو له «سوپرسیکس» نیولې تر پایلوبې به ټولې سیالۍ د سټار ټلوېزیوني شبکې له لارې خپرې شي او ۲ مخکښې لوبډلې به ترې د راتلونکي کال ۵۰ اوریز کرکټ نړیوال جام سیالیو ته لاره پیدا کړي.
.jpg)
افغان کرکټ ملي لوبډله پهداسې حال کې زمبابوی ته روانېږي چې بېګا شپه یې د مېلمه زمبابوی کرکټ ملي لوبډلې پر خلاف وروستۍ ۵۰ اوریزه سیالۍ هم د ۱۴۵ منډو په توپیر وګټله.
پهدې سره افغان کرکټ ملي لوبډلې د عربي اماراتو په سفر کې د ۲ شل اوریزو لوبو په شمول ټولټال ۷ سیالۍ ترسره کړې چې په ۶ لوبو کې یې بریاوې خپلې کړې او د دواړو سیریزونو د اتلولۍ جامونه یې وګټل.
د یادونې ده چې له ۲۰۱۴ کال راهیسې په زمبابوی او عربي اماراتو کې د افغانستان او زمبابوی کرکټ ملي لوبډلو ترمنځ د ۵۰ اوریزو لوبو ۵ سیریزونه او ټولټال ۲۴ سیالۍ شوې چې د ۴ سیریزونو په ګټلو او یو مساوي کولو سره ۱۵ لوبې افغانستان او ۹ بیا زمبایوی ګټلي دي.
رحمتشاه زرمتی د پخواني لوبډلمشر نوروز منګل له ۳۰۶ منډو وروسته دویم افغان توپوهونکی شو چې په یو سیریز کې یې د دویم ځل لهپاره افغانستان ته د تاریخ زیات ۶۸ اوسط سره زیاتې ۲۷۲ منډې جوړوي.
