کابل کې د ټرانسپورټ وزارت، سوداګرۍ خونې، «یو اېس اي ډي» او اتار ادارې په مرسته نن چهارشنبې د (می پر ۱۰مه) د «تیر یا جادې نړیوال سازمان» په اړه د یوې غونډې په ترڅ کې پوهاوی ورکړل شو.
د غونډې ګډونوالو وویل، د تیر سازمان په هکله پوهاوي ورکولو څخه موخه دا ده، چې له کومو لارو چارو کار واخلي، چې افغانستان له جنوبي اسیا او مرکزي اسیا سره ونښلوي.
غونډې ته د سوداګرۍ خونې د مدریت پلاوي مرستیال محمد یونس مومند وویل، چې د تیر سازمان له لارې د ټرانزیټ د لګښت کچه راټیټېږي او لهدې لارې د توکیو صادرات او واردات په اسانۍ سره کېدای شي.
ده زیاته کړه، چې لهدې سازمان سره د افغانستان په صادراتو کې کموالی؛ خو په وارداتو کې زیاتوالی راغلی دی.
مومند دا هم وویل، چې له ۲۰۱۳ کاله راوروسته چې افغانستان د تير سازمان غړی شوی؛ ۱۷ کانټېنره مال صادر شوی؛ خو له ۲۰۱۳ تر ۲۰۱۷ کاله پورې له نورو هېوادونو نه ۱۲۸۶ لارۍ مال وارد شویدی، چې دا توپیر د اندېښنې وړ دی.
ښاغلی مومند وړاندې وايي، چې د اړوندو ادارو نه همکاري، د لارو ستونزې، موټرچلوونکیو ته د وېزو نه ورکول، د دې سازمان په اړه د موټرچلوونکیو نه پوهاوی او ځېنې نورې ستونزې د دې باعث شوېدي، چې د تیر سازمان له ننګونو سره مخ کړي.
د تیر سازمان د پوهاوي ملي غونډې ته د ماليې وزارت معین شفیق الله قاریزاده وویل، چې د صادراتو او وارداتو لهپاره د تیر له سازمانه ګټه اخیستل د خلکو په ژوند مثبته اغېزه کوي او لهدې سازمانه ګټنه به د افغانستان د سوداګرۍ ډېرې ستونزې راکمې کړي.
ښاغلي قاريزاده وویل، چې ماليې وزارت د تیر سازمان د پلي کولو په موخه یو لړ پرګرامونه په پام کې نیولي، چې په مرور د وخت سره به پلي شي.
دوی په پام کې لري، چې په ګمرکونو کې د تیر سیستم مدریت جوړ کړي او د تیر سازمان ته د سرحدي بندرونو لکه تورخم، حیرتان، اقینه، شېرخان بندر ترڅنګ کابل، هرات بلخ، اندخوي او کندوز محصولي بندرونه ور وپېژني.
په غونډه کې د افغانستان د سوداګرۍ او عوایدو متخصص مکس لي وویل، چې دوی به د تیر سازمان په ښه پلي کولو کې خپلو هڅو ته دوام ورکړي او د ټرانسپورټي شرکتونو او د موټرچلوونکیو د ظرفیت لوړولو په موخه به عملي ګامونه واخلي.
