.jpg)
د افغان کرکټ ملي لوبډلې او مینه والو له پاره له یو ورځنیو او شل اوریزو کرکټ کولو وروسته د ټېسټ کرکټ پیلول اوسمهال تر ټولو ستر ارمان دی، چی څه ناڅه د رښتیا کېدو خواته روان دی.
د افغانستان کرکټ ملي لوبډلې له پاره د ټېسټ کرکټ سیالیو امتیاز ورکول د دې ضمانت نه کوي، چې افغانستان دې په نړیوال کرکټ کې له مخکښو کرکټ لوبډلو سره زیاتې سیالۍ وکړي؛ خو افغان کرکټ بورډ او مینه وال یې د ملي لوبډلې په وروستیو لاسته راوړنو ځانونو ته دا حق ورکوي، چې سیالیو ته ورودانګي.
د دې خبرې د اثبات له پاره د زمبابوی او بنګله دېش کرکټ لوبډلې دي، چې د ټېسټ او بشپړ غړیتوب لرلو سره – سره بیا هم د انګلستان، اسټرالیا او هندوستان په څېر هېوادونو له خوا له پامه غورځول شوې دي او په وروستۍ لسیزه کې یوې لوبډلې هم د دې ۲ لوبډلو کوربتوب نه د کړی. خو د زیاتو سیالیو برابرول او د ټېسټ کرکټ سیالیو د امتیاز ترڅنګ د بشپړ غړیتوب اخیستلو له پاره افغانستان ته په کار دي، چې خپله اداره لا پسې پیاوړې کړي اود دویمه درجه هېوادونو په کتار کی په دوامداره توګه د اتلې لوبډلې په توګه لوبې نندارې وکړي، چې د ټېسټ کرکټ سیالیو او بشپړ غړیتوب اخیستلو په پار خپل ځان قوي وساتي.
په همدې حال کې د (کریک انفو) په نوم د کرکټ مشهورې وېبپاڼې د راپور له مخې، د کرکټ نړیوالې شورا (ای سي سي) چې پلان لري، تر ۲۰۱۹ کاله د ۱۰ مخکښو کرکټ لوبډلو ترمنځ ټېسټ کرکټ په ۲ ډلو ووېشي؛ په څوو اونیو کې اعلان وشي.
.jpg)
د یادې شورا اجرایوي مشر ریچرډسن رسنیو سره په خبرو کې ویلي دي، چې د نوي سیسټم له مخې به د افغانستان، ایرلینډ او نیپال په څېر لوبډلو له پاره چانس پیدا شي، چې د ټېسټ کرکټ کولو خوب رښتیا کړي.
د ډیویډ ریچرډسن په وینا، د نوي سیسټم له لارې به د مخکې تګ او شاته تګ کړنلاره عملي کېږي، چې د لومړۍ ډلې کمزورې لوبډله به دویمې ډلې ته راښکته کېږي او د دويمې هغه مخکښه لوبډله به د لومړۍ ډلې هېوادونو سره د ټېسټ کرکټ کولو چانس ترلاسه کوي.
د ښاغلي ریچرډسن په خبره، چې اوسمهال دوی له بشپړ غړیتوب لرونکیو کرکټ هېوادونو سره په خبرو بوخت دي، ځکه د یو شمېر هېوادونو ټېسټ کرکټ ښکته روان دی، چی ښه مثال یې ویسټ انډیز دی.
د کرکټ نړیوالې شورا اجرایوي مشر زیاته کړې ده، که غواړئ په ریښتوني توګه د ټېسټ کرکټ اتله لوبډله وګورئ او دوه اړخیز ټېسټ سیالۍ ننداره کړئ؛ نو باید دغه سیستم پلی شي.
د ډیف ریچرډسن په باور، د نوي سیسټم له مخې به نه یوازې نورو لوبډلو ته د ټېسټ کرکټ کولو برابر حق ورکړل شي؛ بلکې ترڅنګ به یې د هرې ټېسټ لړۍ ځانګړی اهمیت هم پیدا شي.
د کرکټ نړیوالې شورا له نوي اعلان مخکې داسې ویل شوي وو، چې د روانو څلور ورځنیو (انټرکانټېنېنټل) جام سیالیو اتله لوبډله به له لسم مقام لرونکې ټېسټ لوبډلې سره ۲ چلینج کپ ټېسټ سیالۍ وکړي.
