هستي ګل: د کرکټ بورډ ډېرې نیمګړتیاوې مې پټې کړې ګټه یې ونه کړه

د افغانستان په کرکټ بورډ کې د تخنیکې کمېټې مشر او د ۴ م پړاو شپږیزې له پاره د "سپین غرزمریان" کرکټ لوبډلې روزونکی هستي ګل عابد له دغو سیالیو پرېکون وکړ.

پخواني لوبغاړي او په ۲۰۰۸ کال کې د جرسي اتل هستي ګل عابد په خپله رسمي ټولنیزه فیسبوک پاڼه کې لیکلي، چې د خپل ولایت له دولتي او ولسي مشرانو سره ناسته ورته جرم شوه.

عابد وايي، هڅه یې وکړه ترڅو د سپین غر زون د کپټان شفیق الله شفق د بندیز ستونزه له کرکټ بورډ سره په اصولي توګه حل کړي؛ خو د کرکټ بورډ له خوا ورته د "څه کاره" خطاب وشو.

د پخواني ال راونډر په وینا، ورپسې د "سپین غر زمریان" لوبډلې د تشویق په موخه له خپلو مشرانو سره کېناسته، چې د کرکټ بورډ چارواکو له خوا د دوی دغه کار جرم وبلل شو.

هستي ګل عابد زیاتوي، چې "د افغانستان کرکټ بورډ د اوسنۍ ادارې په ډېرو نیمګړتیاوو یې د کرکټ د ښې ورځې له پاره پرده واچوله خو ګټه یې ونه کړه."

نوموړي وویل، د اوسنۍ ادارې خلاف مو د ډېرو خلکو د خولو تړلو هڅه وکړه خو اوسنیو چارواکو ټول حدونه شاته پرېښودل.

د ده په وینا "دهېواد د کرکټ پرمختګ له پاره له خپل سره هم تېردی، خو نه غواړي چی خپل او د افغانستان د کرکټ ګټل شوي نوم ته تاوان ورسیږي، نو له همدې کبله په پیلیدونکي ۴ م پړاو شپږیزه کې هېڅ دندې اخیستلو ته تیار نه دی."

د کرکټ ملي لوبډلې پخواني لوبغاړي وايي، "خپله لوبغاړې پاتې شوی او په دې وخت کې شفیق الله شفق اوچې شونډې نه شي پرېښودی."

د یادونې وړ ده، چې ۴ م پړاو شپږیزه شل اوریزه کرکټ سیالۍ د راتلونکې سې شنبې په ورځ په کابل کی پیلیږي، خو د دفاعي اتلې "سپین غرزمریان" لوبډلې کپټان د کرکټ بورډ له خوا د نامعلوم دلیل له مخې تر نامعلومې نېټې پورې بندیز پرې لګول شوی دی.

د افغانستان په ۴ م پړاو شپږیزه کې د دفاعي اتلې کپټان شفیق الله شفق او اوس د یاد زون د روزونکي هستي ګل عابد نه ګډون خبرې په داسې حال کې کېږي، چې افغان کرکټ بورډ پرون په دغو سیالیو کې د لومړي ځل له پاره د ۷ بهرنیو کرکټ لوبغاړو د لوبېدو اعلان وکړ.

هڅه مو وکړه، چې د شفیق الله شفق د بندیز او دغه راز د هستي ګل عابد دبایکاټ په اړه د افغان کرکټ بورډ او په خپله د روزونکي هستي ګل عابد نظر هم واخلو خو په وار وار هڅو یې ټیلیفون ته ځواب ورنه کړ.