د افغانستان کرکټ بورډ لخوا کرکټ ملي لوبډلې لپاره روزنیز کمپ په ننګرهار ولایت کې روان دی.
د افغانستان کرکټ بورډ وایي چې د روان روزنیز کمپ په ترڅ کې د لوبغاړو ترمینځ دویمه څلور ورځنۍ تمریني سیالۍ په غازي امان الله خان کرکټ نړیوال لوبغالي کې روانه ده.
د روانو سیالیو لومړۍ لوبه د جاوید احمدي په کپتانۍ کې د نبي عیسی خیل د ښکلې بالینګ ۱۰ ویکټو او ناصرجمال د سلیزې په مټ د افغانستان پرمختیایي کرکټ لوبډلې ګټلې وه.
کرکټ بورډ وایي چې د روان روزنیز کمپ او تمریني سیالیو موخه د سکاټلینډ خلاف د راتلونکې جون میاشتې په ۲ مه نیټه کېدونکي څلور ورځنۍ (انټرکانټینینټل) کپ سیالۍ ته چمتووالی دی.
په دې روزنیز کمپ کې د کرکټ ملي لوبډلې ټول هغه ۲۱ تنه لوبغاړي له یو شمیر نورو کورنیو کرکټرانو سره برخه لري چې د انټرکانټینینټل کپ سیالیو لپاره کرکټ بورډ غوره کړیدي.
افغان کرکټ بورډ پلان لري چې له همدې ۲۱ کسیزې لوبډلې څخه به د روانې میاشتې په وروستیو کې د کرکټ بورډ د ټاکوونکي ډلګۍ لخوا دهر اړخیزې څارنې وروسته ۱۵ کسیزه کرکټ ملي لوبډله سکاټلینډ خلاف سیالۍ ته غوره او ولیږي.
تراوسه د سکاټلینډ سفر لپاره په لوبډله کې د کوم استثنایي حالت پرته د کپتان اصغرستانکزي او مرستیال کپتان جاوید احمدي د لوبیدو سل په سلو کې چانس شته ځکه دواړه د ملي لوبډلې کپتان او مرستیال نومول شوي دي خو داچې د سکاټلینډ خلاف سیالۍ ته له ۲۱ کسیزې لوبډلې څخه کوم لوبغاړي غوره کېږي ډیر ژر به معلوم شي.
