.jpg)
افغانستان تینچلیک عالی کینگشی مسؤولری‌نینگ ایتیشیچه، جاری هفته «سه‌شنبه» کون سعودی عربستان‌نینگ جده شهریده 36 اسلامی مملکت‌دن 120 نماینده اشتراکی‌ده افغانستان تینچلیگی و برقرارلیگی توغریسیده ییغین یولگه قوییلیشی اوچون قرار قیلینگن.
سلام‌وطندارگه صحبت بیرگن تینچلیک عالی کینگشی سوزلاوچیسی سیداحسان‌الدین طاهری‌نینگ ایتیشیچه، افغانستان تینچلیگی و برقرارلیگی توغریسیده بیرینچی مرته بونده‌ی کته ییغین یولگه قوییله‌دی. اوشبو ییغین‌نینگ بیرینچی کونی جده شهریده و ایکینچی کونی مکه‌ده یولگه قوییلیشی ممکن.
بیراق، طالبان گروهی بیر اعلامیه ترقه‌تیب ایتیشیچه، مذکور ییغین امریکا و افغانستان حکومتی‌نینگ رسمی‌لرینی تأثیری آستیده یولگه قوییله‌دی و بو گروه‌نینگ نماینده‌لری اشتراک قیلمه‌یدی.
سلام‌وطندارگه صحبت بیرگن افغانستان دینی عالم‌لر کینگشی و تینچلیک عالی کینگشی اعضاسی عطاءالله لودین‌نینگ ایتیشیچه، اوشبو ییغینده دین عالم‌لری افغانستان اوروشی‌نی حرام اعلان قیلگن صورتده، طالبان گروهی افغانستان حکومتی بیلن تینچلیک قیلیش‌گه مجبور بوله‌دی. جناب لودین گه کوره، اشتراکچی‌لرنینگ افغانستان تینچلیگی توغریسیده آچیق پیامی بولیب و بو اوروشنی حرام اعلان قیلیش‌لری لازم.
.jpg)
شو توغریده سیاسی ایش بیلرمان قاضی حسن حقیارنینگ ایتیشیچه، اوشبو ییغینده تینچلیک سوزلشوولری و افغانستاندن امریکا کوچلری‌نینگ چیقیشی نیاز کورینگن صورتده، ایجابی نتیجه بیریشی ممکن؛ بیراق جناب حقیارنینگ اورغولشیچه، طالبان گروهی‌نینگ 16 ییل‌لیک مقاومتی ناتوغری دییلگن حالت‌ده، بو ییغین‌نی نتیجه‌سی ایجابی بولمه‌یدی. اوشبو سیاسی ایش بیلرمان‌نینگ ایتیشیچه، طالبان گروهی اوروشنی سعودی عربستان فتواسی بیلن باشلمه‌گن و بو مملکت‌نینگ فتواسی بیلن یکونلنتیرمه‌یدی.
بوندن آلدین هم، اندونزیاده قطار اسلامی مملکت‌لر و پاکستان‌نینگ دینی عالم‌لرینی اشتراکی‌ده افغانستان تینچلیگی توغریسیده ییغین یولگه قوییلگن ایدی؛ بیراق طالب‌لر بو ییغین گه اشتراک قیلمه‌دی.
