افغانستان ساغلیقنی سقلش وزیرلیگی نینگ بلند مرتبه‌لی، امنیتی تهدید مملکت‌نینگ ایریم ولایت‌لری اینیقسه غرب حوزه‌سیده پولیو ایملش تطبیق ایتیلیشی اوچون ییریک توسق سنله‌دی دیگن.
پولیو یا باله‌لر فلج کسل‌لیگی ویروسی بیمارلیک‌لردن بولیب گوارشی دستگاه و بعضی پیت‌لرده ایسه مرکزی عصب دستگاهی‌نی بوزیب تشلیدی.
ساغلیقنی سقلش وزیرلیگی صحی حذمت‌لر بولیمی‌نینگ اورین باسری داکتر ناجیه طارق‌نینگ بوگون (یک‌شنبه) مملکت غربی تورت ولایتی‌نینگ والی‌لری همده آقسقال‌لری بیلن اوچره‌شیب ایتیشیچه، میلادی جاری ییلده مملکت بویلب 16 مورد پولیو رویخط‌گه آلینگن و بو جلمه‌دن بیش مورد ایسه فراه و هرات ولایتی‌گه تیگیشلی دیر.
ساغلیقنی سقلش وزیرلیگی‌نینگ حساباتیده اوتگن ییل افغانستان‌ده باله‌لرده 28 مورد پولیو رویخط‌گه آلینگن.
ایملش حل یول‌لرینی تاپیش اوچون هرات، فراه، بادغیس و نیمروز ولایت‌لری آقسقال‌لری بیلن اوچره‌شیب ملاقات قیلگن خانم طارق، پولیو ایملش دستوری مملکت نینگ ایریم نابرقرار ولایت‌لری جمله‌دن فراه ولایتی‌ده خوفسیزلیک تهدیدلر سبب عملگه آشیریلمه‌گن دیگن.
ساغلیقنی سقلش وزیرلیگی‌نینگ اورین باسری قورال‌لی طالبلردن ایملش دستوری‌گه توسیق بولمس‌لیک‌لرینی سوره‌گن. چونکه اوشبو برنامه اولرنینگ فرزندلری اوچون هم ایجابی تاثیری بار. خانم طارق، ایملش دستوری‌گه همکارلیک قیلیش بوتون مملکت اهالی‌سی نینگ مسولیتی حسابلنه‌دی دیب، دین عالم‌لری، قوم بویوک‌لری و آقسقال‌لردن بو توغریده همکارلیک قیلیش لرینی طلب قیلگن.
مملکت غربی‌ده جایلشگن فراه ولایتی‌ده جاری ییل تورت مورد پولیو رویخط‌گه آلینگن، اما ولایت محلی بلند مرتبه‌لی رسمیلری مذکورموردلر نا برقرار حدودلرده موجودلیگی‌نی بیلدیرگنلر.
فراه ولایت والی‌سی آصف ننگ، ایملش دستوری اوشبو ولایت‌نینگ 90 % منطقه‌سیده عملگه آشیریلگن دیگن. لیکن، قورال‌لی طالب‌لر نظارتیده بولگن منطقه‌لرده بو لایحه تطبیق ایتیلمه‌گن.
افغانستان ساغلیقنی سقلش وزیرلیگی بوندن آلدین هم جنگری طالب‌لر ایریم ولایت‌لرده ایملش دستوری عملگه آشیریلیشی اوچون توسیق بوله دیلر دیگن ایدی.
دنیا بویلیب افغانستان، پاکستان و نیجریه هنوز هم پولیو اوچون میزبانلیک قیله‌دی. دنیا ساغلیقنی سقلش تشکیلاتی بوندن آلدین افغانستان 2015- ییلده پولیو کسلیگی دن تازه‌له‌نیشی‌گه امید بیلدیرگن ایدی.
