افغانستان جمهور رئیسی‌نینگ بیرینچی اورین باسری جنرال عبدالرشید دوستم‌نینگ طرفدارلریدن مینگ‌لرچه‌سی، نظام‌الدین قیصاری توتقونگه آلینگنی‌گه قرشی 12- کون ناراضیلیک بیلدیریب شبرغان شهری‌نینگ جاده‌لریگه چیقیب و حکومت گه قرشی شعار بیرگن‌لر. اولر دنیا جماعه‌چیلیگی‌دن طرف‌سیز و حقیقت‌نی تاپووچی بیر هیأت یوباریب، نظام‌الدین قیصاری توتقونگه آلینگن موضوعی‌نی یقیندن تیکشیریب و جمهور رئیس‌نینگ بیرینچی اورین باسری جنرال عبدالرشید دوستم مملکت گه قیتیشی اوچون زمینه یره‌تیشی‌نی سوره‌گن.
جوزجان ولایتیده جنبش یاشلری اورین باسری حمیدالله بشردوست و دین عالمی مولوی گل‌رحمان‌نینگ ایتیشیچه، حکومت حاضرگی شرایط‌ده اوزی اوچون خطرلی و جبران ایتیلمس ایش قیلمه‌سی کیره‌ک.
جوزجان حاکمی سوزلاوچیسی محمد رضا غفوری‌نینگ ایتیشیچه، ولایت بناسی‌نینگ ایشیگی اعتراضچی‌لر تامانیدن یاپیلگن و ولایت حاکمی و ایشلاوچیلری اداره‌لریگه کیلمه‌گن.
عین حالده، تخار مرکزی و تومن‌لریده، جنرال دوستم‌نینگ طرفدارلریدن مینگ‌لرچه‌سی توپله‌نیب جمهور رئیس و محلی ارگان‌لر باشلیغی متین بیک‌نینگ صورتلرینی اوت‌گه تارتگن‌لر.
اعتراضچی‌لر تخارنینگ آلتی تومنی‌نی باغله‌یدیگن بنگی و کوکچه کوپریک‌لری منطقه‌سیده تخار-قندوز قتناو یولی‌نی باغله‌گن‌لر.
باشقه بیر تاماندن، مینگ‌لرچه اعتراضچی فاریاب و سرپل ولایتلریده شهرنینگ یوللرینی یاپیب و نظام الدین قیصاری‌نینگ قوییب یوباریلیشی‌نی سوره‌گن‌لر.
بیراق، جمهور رئیس سوزلاوچیسی‌نینگ اورین باسری شاه‌حسین مرتضوی سلام وطندارگه صحبت بیریب ایتیشیچه، جمهور رئیس فاریاب حاکمی بیلن سوزلشوولرنی باشله‌گن و یشاوچیلرنی برچه قیی‌نچیلیک و اعتراض‌لرینی توپله‌گن.
اجتماعی ترماقلرده بیر ویدیو ترقه‌تیلگنیدن سونگ، اعتراض‌لر فاریاب، جوزجان، سرپل و تخار ولایتلریده کوچلنتریلدی. اوشبو ویدیوده ملی خوفسیزلیک و خاص کوچلر، نظام‌الدین قیصاری‌گه تیگیشلی عسکرلرنی، میمنه شهری‌نینگ بیرینچی لواسیده کلتک‌لب قیناققه سالگن‌لر و اولرگه قرشی اهانت‌لی و حقارت‌لی شکلده یانده‌شگن‌لر.
