بروکسلده نطق سوزلهگن ناتو باش کاتبی ینس استولتنبرگ، ینه بیر بار افغانستان حکومتی بیلن همکارلیکلری دوامی اوستیگه تأکیدلهدی. اوشبو ییغینده جناب استولتنبرگ، افغانستان تینچلیک سوزلشوولری اوچون سعود عربستاننینگ یشیل چراغیگه اشاره قیلیب ایتیشیچه، بو تشکیلات افغانستانده تینچلیک و برقرارلیک تأمینلنیشی خصوصیده، برچه مملکتلر و ادارهلرنینگ همکارلیکلریدن حمایت قیلهدی.
ناتو باش کاتبینینگ کوپهیتیریشیچه، بو تشکیلات افغانستاننی یالغیز قویمهیدی و افغانستان تینچلیک لایحهسینی خوش قرشیلهیدی و شونینگدیک، اوروش میدانلریده امنیتی کوچلرنینگ حمایتچیسی بولیب و افغانستانده تینچلیک و برقرارلیک تأمینلنیشی توغریسیده، هیچ قندهی سعی و حرکتدن وازکیچمهیدی.
اوشبو ییغینده افغانستان نمایندهلیگیدن مملکت جمهور رئیسی محمداشرف غنی و اجراییه باشلیغی عبدالله عبدالله اشتراک قیلگن.
بو ییغین کیلهجک ایکی کونگچه دوام ایتهدی و شونچه مدتده داعش گه قرشی خلق ارا ائتلافی، بو گروه گه قرشی کورهشده افغانستان رولی و شو توغریده نیاز بولگن یاردملر بحث گه آلینهدی.
شونینگدیک، ناتو باش کاتبینینگ بوگونکی ییغینیده، اروپا خوفسیزلیگی و بو قارهده امریکا کوچلری کمهییشی، ناتو تشکیلاتی و شمالی اروپا آرهسیده علاقهلر تأمین ایتیلیشی و شونینگدیک، مذکور تشکیلاتدن کانادا چیقیشی بحث قیلینگن.
