هرات، بلخ، تخار، قندوز، بدخشان و سمنگان ولایتلریده اوتکزیلگن ناراضیلیک نمایشلردن سونگ بغلان یشاوچیلریدن اونلرچهسی بوگون تحصن خیمه قوریب و ناراضیلیک نمایش یولگه قوییب اوزگریش اوچون بولگن قوزغلان حرکتدن حمایت بیلدیرگنلر.
اوشبو اعتراضچیلر، ملی بیرلیک حکومت رهبرلری، ملی خوفسیزلیک کینگشی مصلحتچیسی حنیف اتمر و امنیتی ییریک رسمیلر وظیفهلریدن چیکلنیشلرینی سورهگنلر. اولرنینگ ایتیشیچه، حکومت اعتراضچیلرگه قرشی اوق اوزیشگنلرنی تانیب محکمهگه تارتیشی کیرهک.
اوشبو اعتراضچیلرنینگ آگاهلنتیریشیچه، حکومت و دنیاجماعهچیلیگی ایستکلریگه قولاق سالمهگن صورتده، کابل-شمال قتناو یولینی یاپهدیلر.
باشقه بیر تاماندن، افغانستان ملی حرکت حزبی، قوم بویوکلری، مدنی جماعهچیلیک اعضالری و کابل یشاوچیلریدن بیرقطاری، بیر ییغین یولگه قوییب حکومتدن حمایت بیلدیرگنلر و کابلده یولگه قوییلگن اعتراضلرگه نقطه قوییلیب و تحصن خیمهلر کوتریلیشینی طلب قیلگنلر.
مذکور حزبنینگ باشلیغی اسماعیل یوننینگ ایتیشیچه، سیاسی سیمالردن بیرقطاری، قوزغلان حرکتدن فایدهلنیب حکومتنی قیینچیلیککه دوچار قیلهدیلر.
عین حالده، ارگ و اوزگریش اوچون بولگن قوزغلان حرکت اعتراضچیلرینینگ جنجللری سبب، افغانستان باش قارهلاوچیلیگی اوتگن کیچه گارنیزیون باشلیغی گلنبی احمدزی و کابل امنیه قومندانی حسنشاه فروغنینگ ایشلرینی توختهتدی. بیراق، قوزغلان حرکتنینگ ایتیشیچه، مذکور ایکی امنیتی ملازمنی ایشدن آلیش حکومت باشلیغلرینینگ فریبکارلیگی دیر.
اوشبو حرکت اعضاسینینگ ایتیشیچه، حکومت وقت اوتکزیش اورنیده اعتراضچیلرنینگ ایستکلرینی عملگه آشیریشی کیرهک. اولرگه کوره، مذکور حرکتنینگ ایستهگی مسؤوللرنینگ ایشلرینی توختهتیش ایمس، بلکیم ظرفیتسیز مسؤوللرنی ایشدن آلیش دیر.
