مملکت جمهور رییسی محمداشرف غنی‌نینگ ایتیشیچه، الکترونیکی کیم‌لیک توغری‌سیده سونگی قرار افغانستان کابینه‌سی تامانیدن آلینه‌دی.
جمهور رییس، دوشنبه‌کونی «الکترونیکی کیم‌لیک» توغری‌سیده اوتکزیلگن ییغینده، اوشبو کیم‌لیک ترقه‌تیلیشی توغری‌سیده‌گی سونگی ریجه‌نینگ کابینه‌گه یوباریلیشی‌نی سوره‌دی.
شونینگ‌دیک اوشبو ییغینده جمهور رییس غنی، کیم‌لیک ترقه‌تیلیشی اوچون بیللی برنامه ایجاد ایتیلیشی اوستیگه تاکیدله‌دی.
جمهورلیک ریاستی تامانیدن ترقه‌تیلگن خبرنامه‌گه کوره، جناب غنی بو ییغینده، الکترونیکی کیم‌لیک اداره‌سی مدیریتی، فنی کمیته‌لر مسؤول‌لری و حقوق بیلرمان‌لردن کیم‌لیک حجت‌لر ترقه‌تیلیش حقوقی لایحه‌سی اوستیگه ایشلش‌لرینی سوره‌گن.
جمهورلیک ریاستی سراییده اوتکزیلگن ییغینده، سیناو برنامه‌لری اوتکزیلیشی، لایحه نیازلری، معلومات سقله‌نیشی و کیم‌لیک ترقه‌تیلیشی اوچون احتمالی مرکزلر اورنی اوستیگه بحث اوتکزیلگن.
شونینگ‌دیک اوشبو خبرنامه‌ده کیلیشیچه، جمهور رییس غنی، فنی کمیته‌لر و حقوق بیلرمان‌لردن لایحه‌گه قرشی قیینچی‌لیک‌لرگه ییچیم یول تاپیش‌لرینی سوره‌ب، بو لایحه‌گه قرشی توره‌دیگن قیینچی‌لیک‌لرگه ییچیم یول تاپیلیشی‌نی ایسته‌گن.
انه شونده‌ی بوندن آلدین حکومت اجراییه باشلیغی، مسؤول‌لردن الکترونیکی کیم‌لیک ترقه‌تیلیشی اوچون تیزلیکده ایش‌گه کیریش‌لرینی سوره‌گن ایدی.
مملکت اجراییه باشلیغی عبدالله عبدالله‌نینگ ایتیشیچه، تیزلیکده الکترونیکی کیم‌لیک ترقه‌تیلیش ایشی باشله‌نیشی کیره‌ک. شونینگ‌دیک پارلمان سیلاوی‌گچه مملکت یشاوچیلری برچه‌سی الکترونیکی کیم‌لیک قولگه کیریتیشی لازم.
حاضر الکترونیکی کیم‌لیک ترقه‌تیلیشی و ایجاد ایتیلیشی توغری‌سیده‌گی شرط‌نامه‌گه قول قوییلگنی‌دن تورت ییل اوتماقده، بیراق حاضرگچه بو شرط‌نامه عمل‌گه آشیریلمه‌گن.
جمهور رییس غنی، الکترونیکی کیم‌لیک ترقه‌تیلیشی توغری‌سیده بولگن موضوع قرارینی اوشبو کیم‌لیک گه «قوم» آتی ذکر ایتیلیشی توغری‌سیده قرشی فکرلر موجود بولگن بیرچاغده مملکت کابینه‌سی‌گه تاپشیرگن.
گزارشلرگه کوره، پارلمان نماینده‌لریدن بیرقطاری، اوشبو کیم‌لیک گه «قوم» آتی ذکر ایتیلیشی‌نی ایسته‌یدی، اولرنینگ ایتیشیچه، الکترونیکی کیم‌لیک گه «قوم» آتی ذکر ایتیلمه‌گن صورتده، اساسی قانون سوراققه دوچ کیله‌دی؛ چونکه اساسی قانون‌گه برچه قوم‌لردن آت توتیلگن.
بیراق، باشقه بیرقطار نماینده‌لرنینگ اورغولشیچه، نفوسنی روی خطگه آلیش قانونی آلدین پارلمان تامانیدن تصدیق‌لنگن و بو توغریده بحث قیلیش لازم ایمس دیر. اولر برچه کیم‌لیک گه آت اونگیده «افغان» واژه‌سی جایلشتیریلیشی‌نی سوره‌گنلر.
