د افغانستان ولسمشرۍ ماڼۍ وايي، چې جمهور رییس محمد اشرف غني به ډير ژر د سولې عالي شورا نوی مشر وټاکي.
د ولسمشر د ویاند مرستیال دواخان مینهپال سلاموطندار ته وویل، چې اوسمهال د سولې عالي شورا د نوي مشر ټاکلو په باب د مدني فعالانو، سیاسي او حزبي رهبرانو او رسنیو د مسوولینو سره سلا مشورې روانې دي.
مینهپال وايي، چې ډير ژر به یو وړ او خیرخواه شخص دغه څوکۍ ته وپېژندل شي، څو وکولای شي له وسلهوالو مخالفینو سره د سولې خبرې اترې په بریاليتوب سره پای ته ورسوي.
له بل لوري بیا د سولې عالي شورا د نړېوالو اړیکو سلاکار محمد اسماعیل قاسمیار وايي، چې د دغه شورا د مشر ټاکل به د یو اړین مسوولیت ترسره کول وي او وايي، چې دوی هم د یو وړ شخص په لټه کې دي، څو د سولې عالي شورا د مشر په توګه يې پر دنده وګوماري.
اسماعیل قاسمیار زیاتوي، هغه څوک چې د سولې شورا د مشر په توګه پر دنده ګومارل کيږي باید د خلکو د اعتماد وړ شخص وي.
دا په داسې حال کې ده، چې د سولې عالي شورا د پخواني مشر پیر سید احمد ګیلاني له مړینې شاوخوا ۴ میاشتې تیريږي، خو تر اوسه هم د سولې شورا مشر نهدی ټاکل شوی.
